Müqtəda əs-Sədr iraqlıları ABŞ-a qarşı mübarizədə birləşməyə çağırdı

Lent.az-ın “Reuters” agentliyinə istinadən verdiyi məlumata görə, Müqtəda əs-Sədr deyib ki, ABŞ, İsrail və Böyük Britaniya iraqlıların ümumi düşmənidir və bütün vətəndaşlar işğalçılara qarşı mübarizə aparmalıdırlar.

Müqtəda əs-Sədr onu da qeyd edib ki, mübarizə aparmaq mütləq güc yolundan istifadə etmək demək deyil.

Qeyd edək ki, bu, Müqtəda əs-Sədrin İraqa qayıtmasından sonra ilk bəyanatıdır. O, İrandan İraqa 2011-ci il yanvarın 5-də qayıdıb. Onun yaratdığı “Mehdi Ordusu” 2003-2008-ci illərdə ABŞ-ın rəhbərlik etdiyi koalisiya qüvvələrinə qarşı aktiv silahlı mübarizə aparıb. Pentaqon 2006-cı ildə Müqtəda əs-Sədri İraqda stabillik üçün ən təhlükəli şəxslər sırasında göstərib. ABŞ onun tərəfdarlarını minlərlə sünni ərəbi öldürməkdə də günahlandırıb.

Müqtəda əs-Sədr 2007-ci ildə İrana gedib, 2008-ci ildə isə tərəfdarlarını silahı yerə qoymağa çağırıb. Baxmayaraq ki, şiə lideri ABŞ və koalisiya qüvvələrinə qarşı aktiv fəaliyyəti dayandırıb, “Mehdi Ordusu” buraxılmayıb və hələ də İraqda böyük təsir gücünə malikdir.