“Rus muzeyi: virtual filial” mərkəzinin məktəblilər və tələbələr üçün proqramının təqdimatı keçiriləcək

Muzey Mərkəzində “Rus muzeyi: virtual filial” layihəsi çərçivəsində YUNESKO-nun Moskva bürosunun dəstəyi ilə tələbələr və məktəblilər üçün muzey tədris proqramının təqdimat mərasimi olacaq. Muzey Mərkəzindən Lent.az-a verilən məlumata görə, proqram Beynəlxalq Mədəniyyətlərarası əməkdaşlıq çərçivəsində həyata keçiriləcək.

Dekabrın 21-də keçirilməsi planlaşdırılan proqram Beynəlxalq Mədəniyyətlərin Yaxınlaşması İli (2010) çərçivəsində hazırlanıb.

Qeyd edək ki, YUNESKO-nun Moskva bürosu və o cümlədən YUNESKO üzrə Azərbaycan Respublikasının Milli Komissiyası son bir neçə il ərzində “Rus muzeyi: virtual filial” informasiya-maarifləndirici mərkəzində informasiya-kommunikasiya texnologiyalarının inkişafı və istifadəsinə maddi və mənəvi dəstək göstərib.

BMT-nin 2010-cu ili Beynəlxalq Mədəniyyətlərin Yaxınlaşması ili elan etməsilə əlaqədar bu il “Rus muzeyi: virtual filial” layihəsi üzrə başlıca fəaliyyət Beynəlxalq Mədəni Müxtəliflik Gününə (21 may) həsr olunub.

Beynəlxalq Mədəniyyətlərin Yaxınlaşması İli (2010) çərçivəsində Muzey Mərkəzində “Rus muzeyi: virtual filial” informasiya-maarifləndirici mərkəzinin məktəblilər və tələbələr üçün muzey-tədris proqramı hazırlanmışdır. Proqram qavrama və çətinlik səviyyəsinə görə iki hissəyə - gənclər və uşaq auditoriyasına bölünüb.

Adı çəkilən layihənin reallaşdırılması ölkə ərazisində və onun hüdudlarında vahid mədəni-informasiya məkanının genişlənməsinə, o cümlədən xalqlar arasında əlaqələrin möhkəmlənməsinə xidmət edir.

Təqdimat mərasimində Azərbaycan Respublikasının Mədəniyyət və Turizm Nazirliyinin nümayəndələri, kütləvi informasiya vasitələri, Rusiya Federasiyasının Azərbaycandakı səfirliyinin əməkdaşları, muzey direktorları və işçiləri, Azərbaycan Dövlət Mədəniyyət və İncəsənət Universitetinin, Bakı Slavyan Universitetinin, Qərb Universitetinin, Bakı Avropa liseyinin və digər təhsil müəssisələrinin, o cümlədən mədəniyyət və təhsillə bağlı bir çox ictimai və dövlət təşkilatlarının nümayəndələri iştirak edəcəklər.
Lalə Yusifqızı