“Ostankino” yaxınlığında rus millətçiləri aksiya keçirdi, milis güc tətbiq etdi

Axşam saatlarında bir neçə yüz rus millətçi gənci “Ostankino” teleqülləsi yaxınlığında icazəsiz aksiya keçirməyi bacarıb.

Lent.az-ın “İnterfaks” agentliyinə istinadən verdiyi məlumata görə, onlar Moskva ruslar üçündür! sözləri yazılmış plakatlar qaldırıb, eyni zamanda ucadan bu şüarı səsləndiriblər.

Xüsusi təyinatlı milis dəstəsi kütləni dağıtmaq üçün güc tətbiq edib, daha sonra isə aksiyanın ən fəal iştirakçılarını yaxalayıb.

Moskva Daxili İşlər İdarəsinin mətbuat xidmətinin rəhbəri Viktor Biryukov saxlanılanların əksəriyyətinin yetkinlik yaşına çatmayanlar olduğunu bildirib. Onlar əsasən 8-11-ci sinif şagirdləridir.

“İnterfaks” agentliyi son məlumatlara əsasən, Moskvanın müxtəlif rayonlarında saxlanılan şəxslərin sayının 250 nəfəri keçdiyini bildirib. Bunların 130 nəfəri Manej meydanı ətrafında, 70 nəfəri isə “Ostankino” teleqülləsi yaxınlığındakı parkda saxlanılıb. Saxlanılanlar arasında Moskva ətrafındakı yaşayış qəsəbələrindən aksiyalarda iştirak etmək üçün Moskvaya gələnlər də var.