Qəzaya uğrayan təyyarə Azərbaycan yığmasının rəqibini daşıyıbmış - FOTO

Lent.az-ın “nieuwblad.be”yə istinadən verdiyi məlumata görə, bunu təyyarənin hadisə yerindəki fotolarda görünən identifikasiya nömrəsi də sübuta yetirir.

Belçika yığması Rusiya ilə yoldaşlıq görüşü keçirmək üçün Moskvadan Voronejə məhz bu təyyarədə uçub. Həmin vaxt hava nəqliyyatı vasitəsi oyun məkanına əlverişsiz hava şəraiti üzündən nəzərdə tutulan vaxtdan 18 saat gec çatıb. O zamanlar təyyarənin hər hansı probleminin olduğu barədə məlumat verilməyib.

Bundan 17 gün sonra RA-85744 nömrə nişanlı “Tu-154” təyyarəsi 3 mühərrikinin işləməməsi səbəbindən qəza enişi edib. “Vnukovo” hava limanından Mahaçqalaya uçan təyyarə az sonra “Domodedovo” hava limanına enməyə məcbur olub və bu zaman eniş-uçuş zolağından çıxıb. Nəticədə onun gövdəsi 2 yerə bölünüb. 2 nəfər ölüb, 80-dən çoxu yaralanıb.

Qeyd edək ki, Belçika yığması Azərbaycan milli komandasının 2012-ci il Avropa çempionatının seçmə qrup mərhələsindəki rəqiblərindəndir. Millimiz növbəti oyununu martın 29-da səfərdə məhz “qırmızı şeytanlar”a qarşı keçirəcək.