Gürcüstana AB-yə üzvlük üçün ərizə vermək təklif olunub

Avropa Birliyinin prezidenti Joze Manuel Barroza Gürcüstan prezidenti Mixail Saakaşviliyə məsləhət görüb ki, Gürcüstan Avropa Birliyinə və NATO-ya daxil olmaq üçün ərizə versin. Lent.az-ın “newsru.com” saytına istinadən verdiyi məlumata görə, Joze Manuel Barroza Mixail Saakaşvili ilə keçirdiyi birgə brifinqdə deyib ki, belə bir ərizənin təqdim edilməsi Avropa Birliyi ilə Gürcüstan arasında münasibətlərin dərinləşməsinə və Gürcüstanın investisiyalar üçün daha cəlbedici olmasına yol açar.

Joze Manuel Barroza Avropa Birliyinin heç vaxt Gürcüstan ərazisinin bir hissəsinin işğalı ilə barışmayacağını söyləyib.

Mixail Saakaşvili də bildirib ki, Gürcüstanın məqsədi Avropa Birliyinə daxil olmaqdır. O, 19-20 noyabr tarixlərində NATO-nun Lissabonda keçiriləcək sammitində ölkəsinin alyansa üzv qəbul ediləcəyinə də ümid etdiyini dilə gətirib.

Ancaq buna baxmayaraq, NATO baş katibi Andres foq Rasmussen az əvvəl bəyan edib ki, alyans rəhbərliyi Rusiya prezidenti Dmitri Medvedevin Lissabon sammitinin Moskva üçün sürprizsiz keçməsi barədə xahişini qəbul edib. Bu isə o deməkdir ki, Lissabon sammitində Gürcüstanın NATO-ya üzv qəbul edilməsi barədə qərar qəbul olunmayacaq.