Evdə internetin zəif işləməsi həmişə provayderdən və ya routerin köhnəlməsindən qaynaqlanmır. Çoxmənzilli binalarda qonşuların Wi-Fi şəbəkələrinin eyni kanaldan istifadə etməsi də bağlantını yavaşlada bilər.
Lent.az xarici mediaya istinadla xəbər verir ki, belə hallarda yeni avadanlıq almadan əvvəl şəbəkənin işlədiyi kanalı yoxlamaq lazımdır.
Qonşu şəbəkələr sürətə necə təsir edir?
Bu problem xüsusilə 2,4 GHz diapazonunda müşahidə olunur. Bir neçə router eyni kanalda işlədikdə məlumat ötürmək üçün efir vaxtını bölüşməli olur. Nəticədə səhifələr gec açılır, videolar donur və onlayn oyunlarda gecikmələr artır.
Bir-biri ilə üst-üstə düşən qonşu kanallar da əlavə maneə yarada bilər. Buna görə yalnız siqnalın güclü olması sürətli bağlantıya zəmanət vermir.
Problemi necə müəyyənləşdirmək olar?
Android üçün “Wi-Fi Analyzer” kimi tətbiqlər ətrafdakı Wi-Fi şəbəkələrinin hansı kanallarda işlədiyini göstərir. Bu məlumat əsasında hansı kanalda daha çox şəbəkə olduğunu görmək mümkündür.
Lakin belə tətbiqlər internetin zəifləməsinin bütün səbəblərini müəyyən etmir. Onlar əsasən ətrafdakı şəbəkələri, siqnal gücünü və kanalların üst-üstə düşməsini qiymətləndirməyə kömək edir.
Kanalı dəyişmək kömək edə bilər
İstifadə etdiyiniz kanal sıxdırsa, routerin ayarlarında daha az yüklənən kanalı seçmək olar. 2,4 GHz diapazonunda 20 MHz kanal eni ilə işləyərkən adətən 1, 6 və 11-ci kanallara üstünlük verilir.
Router və qoşulan cihazlar dəstəkləyirsə, 5 GHz diapazonundan istifadə də sıxlığı azaltmağa kömək edə bilər. 6 GHz bağlantısı üçün isə həm routerin, həm də cihazın bu diapazonu dəstəkləməsi tələb olunur.
Kanalın dəyişdirilməsi qonşu şəbəkələrdən qaynaqlanan problemi yüngülləşdirə bilər. Bununla belə, sürətin tam bərpasına zəmanət vermir: routerin yerləşməsi, divarlar, qoşulan cihazların sayı və provayderin bağlantısı da nəticəyə təsir göstərir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
