Xarici işlər nazirinin müavini Xələf Xələfov Kambocanın Azərbaycanda səfərdə olan dövlət katibi Ouch Borithin rəhbərlik etdiyi nümayəndə heyətini qəbul edib. Xarici İşlər Nazirliyinin mətbuat xidmətindən Lent.az-a verilən məlumata görə, X. Xələfov Azərbaycan ilə Kamboca arasında beynəlxalq təşkilatlar çərçivəsində əməkdaşlığın yüksək qiymətləndirildiyini qeyd edərək, Ermənistan-Azərbaycan münaqişəsində Azərbaycanın ədalətli mövqeyini dəstəklədiyinə görə Kamboca tərəfinə təşəkkürünü çatdırıb. İkitərəfli əlaqələrin inkişaf etdirilməsinə toxunan nazir müavini iqtisadi, təhsil və enerji sahəsində əməkdaşlıq üçün əlverişli imkanların olduğunu qeyd edib.
O. Borith dövlətlərin ərazi bütövlüyü və suverenliyinə hörmət edilməsinin Kambocanin xarici siyasətinin təməl prinsiplərindən biri olduğunu deyərək, ölkəsinin zor işlətməklə dövlətlərin sərhədlərinin dəyişdirilməsinə yönəlmiş hərəkətlərin əleyhinə olduğunu və bu əsasda da Azərbaycanın ərazi bütövlüyü və suverenliyinin Kamboca tərəfindən dəstəkləndiyini vurğulayıb.
Sovet İttifaqı zamanı kambocalı tələbələrin Azərbaycanda təhsil alması üçün yaradılmış imkanlara görə Azərbaycan hökumətinə təşəkkürünü çatdıran O. Borith Azərbaycan ilə təhsil sahəsində əməkdaşlığın davam etdirilməsi niyyətində olduqlarını nəzərə çatdırıb. O, Azərbaycanın enerji sahəsində zəngin təcrübəyə malik olduğunu qeyd edərək, bu sahədə də Azərbaycan ilə əməkdaşlıqda maraqlı olduqlarını bildirib.
Görüş əsnasında qarşılıqlı səfərlərin təşkili və ölkələrimiz arasında müqavilə-hüquq bazasının da genişləndirilməsi məsələləri də müzakirə olunub.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
