Rauf Arifoğlu Ramil Usubovla görüşüb

“Daxili işlər naziri Ramil Usubov mənim müraciətimi müsbət cavablandırdı və biz bu gün nazirlikdə onunla görüşdük. Mənim müraciətimin səbəbi və görüşdə müzakirə mövzusu isə əməkdaşımız Fərahim İlqaroğluna qarşı həyata keçirilən cinayətin istintaqı idi ”.

Bu sözləri müsavat.com-a “Yeni Müsavat” qəzetinin baş redaktoru Rauf Arifoğlu deyib.

Qeyd edək ki, R. Arifoğlu bu gün rəhbərlik etdiyi qəzet vasitəsi ilə nazirə müraciət edərək, istintaqın gedişindən narahat olduğunu və bununla bağlı onunla görüşmək istədiyini bildirmişdi: “Ötən həftədən başlayaraq DİN mətbuat xidmətinin rəhbəri vasitəsi ilə görüş istədim. Bu gün də qəzet vasitəsi ilə müraciət etdim. Sonunda cənab nazir məni qəbul etdi. DİN Baş İstintaq və Təhqiqat İdarəsinin rəisi Sərvər Mehrəliyevin və Mətbuat xidmətinin rəisi Sadiq Gözəlovun iştirakı ilə jurnalistə qarşı törədilən cinayət işini və onun gedişatını müzakirə etdik. Sərvər Mehrəliyev işin istintaqı ilə bağlı ətraflı məlumat verdi. Mən müşahidə etdim ki, Ramil Usubov da prosesi dəqiqliklə bilir”.

R. Arifoğlu deyib ki, o, bir sıra yeni məlumatlar əldə edib: “Təəssüf ki, onları mətbuata açıqlaya bilməyəcəm. Bunlar məmnunedici detallar idi. Lakin mən narahatçılığımı bildirdim və bu cinayət işinin törədilmə səbəbləri ilə bağlı mülahizələrimi açıq şəkildə dilə gətirdim. Artıq heç kəsə sirr deyil ki, F. İlqaroğlunu döyən və onu sifariş edən idmançılar deputat Elton Məmmədovun oğlu Aynara bağlıdır... Eyni zamanda, cinayəti icra edən F. Termişi ilə bağlı redaksiyanın əldə etdiyi özəl məlumatları bölüşdüm. Məni səbrlə dinlədilər. Baş İstintaq və Təhqiqat İdarəsinin rəisi Sərvər Mehrəliyev müəyyən qeydlər götürdü. Cənab nazir dedi ki, jurnalistlər də riskli peşə ilə məşğuldurlar. Buna baxmayaraq, polisin işi cəmiyyətin bütün fərdləri kimi həm də jurnalistləri qorumaqdır”.

R. Arifoğlu deyib ki, müəyyən nəticələr var, bundan sonra da istintaqın obyektiv və hərtərəfli aparılacağına inanır: “Cənab nazir məni əmin etdi ki, bu iş tam olaraq araşdırılacaq və bütün təqsirkarlar, kimliyindən asılı olmayaraq, cəzalarına çatdırılacaq. Daha sonra istintaqın rəisinə lazım olan tapşırıqları verdi”.

Baş redaktor deyib ki, nazirlə görüşdən sonra onda bu işin tezliklə açılacağına dair böyük ümid yaranıb: “Nazir bu prosesi öz nəzarətində saxlayır və bunu da təsiri artıq hiss olunmaqdadır. Sabah – 14 mayda Fərahim İlqaroğlunu da təkrar istintaqa çağırıblar. Hesab edirəm ki, prosesə ciddi təkan verə bilmişik”.