“İdarə Heyətinin qərarı ilə hesablaşmağa məcburam. Mən İdarə Heyətinin iclasında öz izahlarımı verdim, arqumentlərimi gətirdim. Amma İdarə Heyəti bunu inandırıcı qəbul etmədi”.
Bunu APA-ya açıqlamasında REAL-ıən məclis başqanı Erkin Qədirli vəzifəsindən kənarlaşdırılmasına münasibət bildirərkən deyib.
E. Qədirli qərarla razılaşmasa da, İdarə Heyətinin qərarını qəbul etməyə məcbur olduğunu qeyd edib. Onun sözlərinə görə, qərara şəxsi münasibətlər təsir göstərməyib: “Mən REAL-ın qurucularındanam. REAL mənim üçün daha çox bir missiyadır. Mənə qarşı heç bir şəxsi-qərəzlik yoxdur. Biz çalışırıq ki, şəxsi münasibətlərimizi hərəkata gətirməyək. Orda hamı mənə hörmətlə yanaşır. Onlar hesab edirlər ki, mənim fikirlərim REAL-ın təməl prinsiplərinə uyğun deyil. Yəni, buna heç bir şəxsi münasibət təsir göstərməyib. REAL-ın prinsiplərini qəbul etməsəydim, hərəkatdan çıxardım. REAL-ın proqramının hazırlanmasında şəxsən iştirak etmişəm. Fikirlərimdə qəzəbli, ehtiyatsız ifadələr işlətmişəmsə, təbii ki, mənim məsuliyyətimdir”.
***
12.31
Respublikaçı Alternativ (REAL) Hərəkatının İdarə Heyətinin mayın 12-də iclası keçirilib. Lent.az-ın məlumatına görə, iclasda partiyalaşma ilə bağlı məsələlərlə yanaşı, REAL Məclis Başqanı və İdarə Heyətinin üzvü, Erkin Qədirlinin son vaxtlar verdiyi müsahibələrdə və sosial şəbəkələrdə yaydığı ifadələrdə, həmçinin, həmin ifadələrə gətirdiyi izahlarda buraxdığı ciddi yanlışlıqlar müzakirə olunub. Qeyd olunub ki, əvvəlki iclaslarda edilmiş şifahi xəbərdarlıqlara baxmayaraq, Erkin Qədirli yanlışlıqlarını düzəltməyə əməli cəhd göstərməyib. Ona görə də, təklif olunub ki, Erkin Qədirli REAL Hərəkatının məclis başqanı və İdarə Heyətinin üzvü vəzifələrindən çıxarılsın. Bu təklif REAL Hərəkatının İdarə Heyətinin Sədri, İlqar Məmmədova da öncədən göndərilib.
İlqar Məmmədovun da rəyi nəzərə alınmaqla, İdarə Heyəti qərara alıb ki, Erkin Qədirli məclis başqanı vəzifəsindən azad edilsin.
Erkin Qədirliyə REAL Hərəkatının fəaliyyəti ilə bağlı kütləvi informasiya vasitələrinə müsahibə vermək hüququ 3 ay müddətinə qadağa qoyulub.