“Onlar Söyün Sadıqovun dəstəyi ilə təxribatçılıqla məşğuldurlar”

Demokratik Azərbaycan Dünyası Partiyası (DADP) partiya adından bir qrup şəxsin birinci xanım, YAP sədrinin müavini Mehriban Əliyevanın prezidentliyə namizədliyinin irəli sürülməsinə etiraz olaraq mətbuat konfransı keçirilib.

DADP mətbuat xidmətinin rəhbəri Esmira Şükürova bildirib ki, son vaxtlar partiya daxilində partiyadan azad olunan bir qrup təxribatçı insan qisas məqsədi ilə bir partiyanın əleyhinə fəaliyyətə başlayıb: “Biz bununla bağlı aidiyyatı orqanlara müraciət etmişik. Onlar Azərbaycanda təxribatçılıqla məşğuldurlar”.

Partiyanın sədr müavini Ramiz Orucov deyib ki, 13 oktyabr 2012-ci ildə DADP növbədənkənar qurultay keçirib və Fatma Əliyeva sədr seçilib: “Fatma Əliyeva partiya sədri seçildikdən sonra partiyada təmizləmə işləri aparılıb. Dekabr ayında isə partiyanın icraçı katibi Sevda Qələndərli Gürcüstan vətəndaşı olduğuna və təxribatçı fəaliyyətinə görə partiyadan uzaqlaşdırılıb. Xarici vətəndaşın Azərbaycanda siyasi partiyada fəaliyyət göstərməsi nə dərəcədə düzgündür? Partiyadan uzaqlaşdırıldıqdan sonra o Gürcüstana gedərək müxtəlif soyadlarla bir neçə dəfə geri qayıdıb. Partiya adına saxta möhür düzəldərək qurultay keçirib və özünü sədr təyin edib”.

R. Orucov qeyd edib ki, həmin şəxslərin DADP adından namizəd irəli sürməsi mümkün deyil.

Partiya sədri Fatma Əliyeva isə qeyd edib ki, partiyaya aid bütün sənədlər ondadır: “Onlarda isə bu möhürün saxtalaşdırılmış forması var”. Onun sözlərinə görə, Sevda Qələndərli Söyün Sadıqovdan maliyyə dəstəyi ilə Azərbaycanda təxribatçılıqla məşğuldur: “Partiyaya aid bütün sənədləri aidiyyatı orqanlara təqdim etdik. Bunlar hər addımda nizamnaməni pozublar. Bunların keçirdiyi qurultayda tələbələrə qul bazarında işləyənlərə müəyyən məbləğdə pul verərək çağırıblar”.

S. Əliyeva vurğulayıb ki, DADP prezident İlham Əliyevin namizədliyini dəstəkləyir.