“Bu, hərbi çevriliş deyil” - MÖVQE

Bakı Musiqi Akademiyasının misirli doktorantı APA üçün məqalə yazıb

“Allaha şükürlər olsun ki, 2013-cü il iyunun 30-da Misir xalqı bir daha öz dönməz iradəsini nümayiş etdirərək 25 yanvar 2011 inqilabi hərəkatına düzəliş etdi”.

Bu fikirlər Misirin Helvan Universitetinin müəlliməsi, hazırda Üzeyir Hacıbəyli adına Bakı Musiqi Akademiyasında çalışan doktorant Mune Abdul-ğani Zidanın APA-ya göndərdiyi məqalədə öz əksini tapıb.

“Doğru yolu müəyyənləşdirən 30 iyun 2013 inqilabı” adlı məqalədə Misirdə müvəqqəti olaraq prezident seçilən Konstitusiya Məhkəməsinin sədri Adli Mahmud Mansurun xristian dininə mənsub olması barədə fikirlər təkzib olunur: “Çox böyük təəssüf hissi ilə qeyd etmək istəyirəm ki, xarici ölkələrin mətbuatında, televiziya kanallarında və sosial şəbəkələrində Misirin müvəqqəti prezidenti seçilən Konstitusiya Məhkəməsinin sədri Adli Mahmud Mansurun xristian dininə mənsub olması qeyd edilir. Lakin, bu, düzgün deyil. Misir islam dövlətidir və onun əhalisinin böyük əksəriyyətini müsəlmanlar təşkil edir. İstər müvəqqəti prezidentin, istərsə də başqa birisinin qeyri-müsəlman olması mümkün deyil. Elə ilk baxışdan da hiss olunur ki, o müsəlmandır, axı, onun atasının adı Mahmuddur. Habelə, xarici ölkələrin mətbuatında iddia olunur ki, Misir Silahlı Qüvvələrinin ali baş komandanı yəhudi mənşəlidir. Lakin, bu, cəfəngiyyatdan başqa bir şey deyil”.

Xanım Mune Abdul-ğani Zidan məqaləsində qeyd edir ki, bu gün xarici media orqanlarında yazılanlar yalan iddialardan, həqiqətin saxtalaşdırılmasından başqa bir şey deyil: “Bunu edənlərin məqsədi isə Misir xalqının iradə və əzmkarlığına kölgə salmaq və onun haqq səsini boğmaqdır. Biz Misir xalqı olaraq 30 iyun 2013-cü ildə Qahirənin bütün küçə və meydanlarına çıxaraq öz tələbimizi irəli sürdük və bəşər tarixində heç bir inqilabi hərəkatda görünməyən 33 milyon insandan ibarət əzəmətli bir xalq hərakatı təşkil etdik. Biz küçə və meydanlara axışdıq ki, “Müsəlman qardaşları” və onlara məxsus Misir prezidentini Məhəmməd Mursinin hakimiyyətini devirək. Məhəmməd Mursi hakimiyyətə gələrkən vədlər verib and içmişdi ki, xalqın mənafeyini həmişə uca tutacaq. Lakin, bu vədlərin heç birini yerinə yetirmədi. Günlər ötdükcə aydın oldu ki, o, xalqının kiçik ehtiyaclarını belə yerinə yetirməkdə acizdir. Onun hakimiyyətdə olduğu müddətdə Misir xalqı böyük çətinliklərlə üzləşdi. Elektrik enerjisi və su verilişi, benzin və digər yanacaq növləri ilə təchizatda böyük çətinliklər yaranması ilə yanaşı qiymətlər də böyük ölçüdə qalxdı. Qeyd edilən bu problemləri həll etmək əvəzinə hökumət xalqın üzləşdiyi çətin məişət durumuna laqeydlik nümayiş etdirdi.

Əksər önəmli sahələrdə rəhbərliyi ələ keçirən hakimiyyətin dayaq durduğu monopoliya xalqı istismar etdi. Biz gördük ki, devrilmiş prezident Məhəmməd Mursi xalqın problemləri ilə maraqlanmır və bu istiqamətdə heç bir qərar qəbul etmir, əksinə öz ətrafında toplananların mənafeyinə xidmət edir və xalqın gündən – günə artan problemləri onu qətiyyən maraqlandırmır”.

Məqalədə deyilir ki, Məhəmməd Mursi qanunun aliliyi və onlara riayət olunması ilə bağlı vədlərinə əməl etməyib: “O, uğrunda günahsız şəhidlərin qanları axıdılan 25 yanvar inqilabının qarşıya qoyduğu heç bir hədəfi yerinə yetirmədi. Amma 25 yanvar inqilabı ölkənin xoş gələcəyi uğrunda mübarizədə şəhid olan neçə-neçə vətən övladlarının analarının gözünü yaşlı qoymuş, Misir ailələrinə günahsız övlad itkisi nəsib etmişdi. Devrilmiş prezident və onun tərəfdarları yalan vədlər verməklə yanaşı din adından da, öz çirkin məqsədlərini ört-basdır etmək və nümayişçiləri qorxutmaq üçün istifadə edib. İslam və digər dinlər bəşəriyyətə tərəqqi, əxlaqın saflaşmağı və həyatın özəyi olaraq bəxş edilib. Amma “Müsəlman qardaşları” bu gözəlliyə ləkə gətirməyə çalışaraq insanların düşüncələrindəki İslam əxlaqının gözəlliklərini və saflığını ləkələməyə cəhd etdilər. Allaha şükürlər olsun! İslam ümmətində xeyir həmişə şər üzərində qələbə çalır. Bəli, əminliklə söyləmək olar ki, siyasətlə dinin bir arada olması tamamilə mümkündür. Allahın ən sadiq abidi olan Peyğəmbərimiz Məhəmməd(s) bütün bəşəriyyətə dahi siyasətçi, şücaətli rəhbər və uca Allaha sadiq olmağın nümunəsini göstərdi. Peyğəmbərimizin həyat tərzi bütün bəşəriyyət üçün ən gözəl nümunədir. “Müsəlman qardaşları”nın problemi ondan ibarətdir ki, onlar din və ona münasibət yollarını dərk etməkdə çətinlik çəkirlər və hər şeyi digərlərinə məhəl qoymadan öz istəklərinə və mənafelərinə uyğun şəkildə çözürlər. Onlar din adından istifadə edərək öz istədiklərini edirlər, amma bu Allah qarşısında günahdan başqa bir şey deyildir.

Biz Misirdə baş verənləri hərbi çevriliş hesab edərək, bunu demokratiyaya və qanunlara qarşı inqilab adlandıran və beləliklə də, həqiqəti təhrif edən xarici medianı kəskin şəkildə rədd edərək bəyan edirik ki, Misir xalqı zülmə sədd çəkmək, demokratiya və həqiqətin bərqərar olması üçün ayaqdadır. Bu hərbi çevriliş deyil, bu məhz, Misir xalqının özünün etdiyi bir inqilabdır. Ordunun sahibi xalqdır, ordu isə xalqın iradəsinə xidmət edir. Təbii ki, bu inqilabda xalqına, onun iradəsinə xidmət edən və xalqının vətəndaşlarını qoruyan ordunun çox böyük xidmətləri oldu. Misirdə baş verənlər siyasi prinsip və normaların reallaşmasının təzahürü olaraq hərbi çevrilişlə heç bir əlaqəsi olmayan qanunauyğun proseslərdir. Müxtəlif təbəqələrin milyonlarla nümayəndəsinin küçələrə axışması Misirdə baş verən inqilabın xalq inqilabı olmasına dəlalət edir. Ordu bəyan etdi ki, o, ölkəni idarə etmir və bu işlərə müdaxilə etmək niyyətində deyil və yalnız vətəndaşları qorumaq, ölkədə əmin-amanlığın qorunmasına töhfə vermək onun məqsədidir. Ordu ancaq milyonlarla küçələrə çıxan misirlilərin səsinə səs verərək onların mənafeyinə xidmət edir. İndi hamını vətən naminə onun mənafeyi naminə birləşməyə çağırırıq. Kim ki, Vətənə daha sadiqdir, o bizim səsimizə səs verəcək.

Mən vətənimə sadiqliyimi və doğma ölkəm olan Misirə dərin məhəbbətimin təcəssümü olaraq, bu məlumatları sizlərə təqdim edərək bütün yalan və həqiqətdən uzaq iddialara sizlərin inanmamağınız üçün bu addımı atdım, məqsədim yalnız əsl həqiqəti bəyan etmək oldu. Bu gün Misir həqiqətləri təhrif edən xarici medianın hədəfindədir. Hər bir misirlinin borcudur ki, Misirdə baş verən hadisələrin həqiqi mahiyyətini bütün dünya ictimaiyyətinin düzgün anlaması üçün əlindən gələni əsirgəməsin. Biz xaricdə yaşayan misirlilər ölkəmizin həqiqətləri əks etdirən güzgüsü rolunu oynayırıq. Uca Allah ölkəm və əziz Vətənim üçün xeyir olacaq hər şeyə yar olsun və yalançıların yalanlarını və nifrət edənlərin nifrətini faş etsin. Amin!”