Milli Məclisin iclasları dayandırılsın - Komitə sədri

“Milli Məclisin növbədənkənar sessiyasının davam etdirilməsinə ehtiyac yoxdur, hazırda buna bir zərurət də görmürəm”.

Bunu APA-ya açıqlamasında parlamentin Əmək və sosial siyasət komitəsinin sədri Musa Quliyev bildirib.

M. Quliyev deyib ki, 125 nəfərin bir zala yığılması istənilən halda riskdir: “Digər tərəfdən, sabah 30 deputat koronavirusa yoluxsa, Milli Məclis tamamilə iflic duruma düşə bilər. Kvorum olmayanda isə parlamentin fəaliyyəti dayanacaq. Bu, ciddi məsələdir”.

Deputat qeyd edib ki, əslində, yaz sessiyası bitib: “Növbədənkənar sessiyanın vaxtını özümüz müəyyənləşdiririk. İndi olmasın, avqustda olsun. Hər halda virusun yayılması ilə bağlı pik dövrü keçsin, sonra keçirilə bilər. Düzdür, Milli Məclisdə sosial məsafə gözlənilir, maska taxılır, amma içəridə insan 2-3 saat nəfəs alıb-verirsə, virusun konsentrasiyası artır”.

M. Quliyev bəzi deputatların iclasların onlayn keçirilməsini təklif etdiklərini söyləyib: “Ancaq bunun üçün bəzi texniki imkanlar araşdırılmalı, mexanizm olmalıdır. Onlayn səsvermə qanunvericiliyimizdə də yoxdur. Digər tərəfdən, informasiya təhlükəsizliyi qorunmalıdır. Onlayn formada iclası da ya “Facebook”, ya da “Zoom” proqramı üzərindən etmək olar, o proqramların da idarəçiliyi bizdə deyil, ABŞ-dadır. Ona görə də informasiya təhlükəsizliyi məsələləri araşdırılmalıdır. Lakin bizim hazırda təcili qəbul etməli olduğumuz qanun yoxdur. İclasları payıza kimi təxirə salmaq olar. Payıza qədər informasiya təminatı, təhlükəsizlik məsələlərini həll etmək lazımdır. Çünki virusun nə qədər davam edəcəyi məlum deyil. Payızda ikinci dalğanı proqnozlaşdıranlar da var. Payızda büdcə layihəsi müzakirə çıxarılmalıdır. Yəqin ki, bu barədə Milli Məclisin rəhbərliyinin düşüncələri var. Bu saat 12.00-da parlamentə komitə sədrlərinin iclası olacaq, bəlkə bu məsələlər barədə orada məlumat verilər”.