“Ermənistan tərəfi məsələnin həllindən yayındı”

“ATƏT-in Astana sammitində Dağlıq Qarabağ münaqişəsinin həllinə dair ciddi cəhdlər göstərildi. Faktiki olaraq böyük dövlətlər mövqelərini ortaya qoydular və bildirdilər ki, bu münaqişənin sülh yolu ilə həlli üçün dövlətlər bir-birinə güzəştə getməlidirlər. Təəssüf ki, biz bunu görmədik, Ermənistan tərəfi mübahisə mövzusu olan məsələləri qabardaraq məsələnin həllindən yayındı”.

APA-nın məlumatına görə, bu açıqlamanı jurnalistlərə Prezident Administrasiyasının ictimai-siyasi şöbəsinin müdiri Əli Həsənov verib. O bildirib ki, Astana sammitindən sonra ATƏT-in Minsk Qrupunun fəaliyyətinin aktivləşdiriləcəyi gözlənilir: “Biz bu prosesin daha da aktivləşəcəyini gözləyirdik. Cənab prezident dedi ki, Azərbaycan tərəfinin səbrinin bir həddi var. Bu məsələnin sülh yolu ilə həlli prinsipinin qəbul etdirilməyə çalışılır və bu, o zaman mümkündür ki, Ermənistan tərəfi konstruktiv mövqe nümayiş etdirsin. Ermənistan Azərbaycanı münaqişənin sülh yoluna sürükləyib, özü bu yola gəlməyəcəksə, biz torpaqlarımızı azad etmək hüququnu özümüzdə saxlayacaq. Günün birində beynəlxalq ictimaiyyət Azərbaycanın öz gücü ilə torpaqlarını azad etməsinə təəssüflənməsin”.

Ə.Həsənov bildirib ki, Azərbaycan sammitin protokoluna bir şərtlə imza atıb: “Burada qeyd olunur ki, beynəlxalq birlik məsələnin sülh yolu ilə həllində rolunu gücləndirəcək. Ermənistan əgər buna gəlməyəcəksə, Azərbaycan öz torpaqlarını azad etmək hüququnu özündə saxlayacaq”.