Bakı sammitində prezidentlərə imzalamaq üçün iki sənəd təqdim olunacaq

APA-nın “Turkmenistan.ru” saytına istinadən verdiyi məlumata görə, bu barədə Rusiya prezidentinin sərhədlərin delimitasiyası və demarkasiyası üzrə xüsusi nümayəndəsi Aleksandr Qolovin deyib.“Birinci sənəd Xəzərdə təhlükəsizliyə dair əməkdaşlıq haqqında sazişdir. Əgər bu sənəd imzalansa, o əldə olunmuş ikinci vacib sənəd olacaq. Biz addım-addım irəliləyirik, dəniz mühitinin qorunması üzrə çərçivə konvensiyası var, indi də protokollar hazırlanır. Biz Xəzərin ekologiyasına dair təhlükələrlə aktiv və səmərəli mübarizə aparmaq üçün biz bu konvensiyanın bütün potensialından istifadə edə biləcəyik”.

Diplomat həmçinin bildirib ki, təhlükəsizlik haqqında saziş yeni çağırış və təhlükələrlə mübarizə də daxil olmaqla Xəzərdə təhlükəsizliyin təmin olunması üçün mexanizm rolunu oynayacaq.

Qolovinin sözlərinə görə, prezidentlərə təqdim olunacaq digər sənəd birgə bəyanat olacaq: “Xəzərin hüquqi statusuna gəldikdə, xarici işlər nazirləri müavinləri səviyyəsində işçi qrup Konvensiya üzərində işi davam etdirir”.

Xatırladaq ki, sayca 4-cü olan Xəzəryanı ölkələrin dövlət başçılarının növbəti sammiti noyabrın 18-də Bakıda keçiriləcək.