Dumanın MDB üzrə komitə sədrinin müavinini Azərbaycana görə vəzifəsindən çıxarırlar

Bu gün “Vahid Rusiya” fraksiyasında qalmaqallı iclas keçiriləcək. Lent.az-ın “Vedomosti” qəzetinə istinadən verdiyi məlumata görə, bunu Dövlət Duması və Rusiya Prezident Administrasiyasındakı mənbələr bildiriblər.

İclasda Dövlət Dumasında MDB üzrə komitənin sədr müavini Konstantin Zatulinin postundan uzaqlaşdırılmasının müzakirəyə çıxarılacağı və bu barədə Dövlət Dumasına müraciət edilməsi barədə qərarın qəbul olunacağı gözlənilir. “Vedomosti” qəzeti yazır ki, Konstantin Zatulinin vəzifəsinin əlindən alınmasının gündəmə gəlməsinin səbəbi onun “Rusiyaya dost ölkələrlə problem yaratmasıdır”.

Qəzet xatırladır ki, Konstantin Zatulin bu ilin mayında Dağlıq Qarabağda seçkiləri müşahidə etməyə getdiyi üçün Azərbaycanda arzuedilməz şəxs elan olunub. Eyni zamanda oktyabrda Krımda keçirilən seçkilərlə bağlı hakim Regionlar Partiyasını tənqid edib. “Vedomosti” vurğulayır ki, Konstantin Zatulinin qalmaqalları nə Prezident Administrasiyasında, nə Xarici İşlər Nazirliyində, nə də Dövlət Dumasının komitəsində yaxşı qarşılanmır. Digər tərəfdən, Konstantin Zatulin Moskvanın keçmiş meri Yuri Lujkovun komandasının keçmiş üzvüdür və merin istefasından sonra da Dövlət Dumasının deputatları ilə söhbətdə yenə də onu tərifləyib.