YUNESKO “Erməni xaçkarlar”ını müzakirəyə çıxarmağa hazırlaşır

İsveç Azərbaycanlıları Konqresi (İAK) YUNESKO-nun baş katibi İrina Bokovaya etiraz məktubu göndərib.
Diasporla İş üzrə Dövlət Komitəsinin mətbuat xidmətindən Lent.az-a verilən məlumata görə, etirazın səbəbi bu təşkilatın noyabrın 15-19-da Keniyada keçiriləcək 5-ci sessiyasında “Armenian cross-stones” (“Erməni xaçkarlar”) adlı məqalənin müzakirəsinin nəzərdə tutulmasıdır.
Belə bir məqalənin sessiyada müzakirəyə çıxarılacağı barədə qurumun internet saytında məlumat verilib. İsveçdə yaşayan azərbaycanlıları ətrafında birləşdirən İAK bu məqalənin saxta faktlar əsasında hazırlandığını İrina Bokovanın diqqətinə çatdırıblar.
Məktub müəllifləri yazırlar ki, məqalədə “Ermənistan tarixində xaçkarların müxtəlif dövrlər keçməsi – inkişafdan durğunluğa doğru (işğal dövrlərində), unudulması (Sovet ateizmi dövründə) və hətta məhv edilməsi (hərbi münaqişə nəticəsində)” kimi iddiaların xüsusən məyusedici və təəsüfləndiricidir: “Biz hesab edirik ki, bu cür iddalarla dolu məqalənin müzakirəyə çıxarılması Ermənistan-Azərbaycan, Dağlıq Qarabağ münaqişəsi və onun həlli ilə bağlı YUNESKO-nun bəyan etdiyi mövqeyinə ziddir. “Nor-Jugha xaçkarların məhvi…”, “xaçkarlar “erməni soyqırımı” qurbanlarına həsr edilərək…”, “Artsax hərəkatının döyüşçülərinə həsr edilərək…”, “Almaniya, Fransa, Livan, Dağliq Qarabağ və Ermənistanda parklarda, kilsələrdə və məzarlıqlarda ucaldılmışdır” kimi ağlasığmaz ifadələr və iddialar məqalənin mahiyyətini, saxtakarlıqlara əsaslandığını bildirən digər nümunələrdir. Azərbaycanın ayrılmaz hissəs olan Dağlıq Qarabağın müstəqil dövlətlər arasında göstərilməsi isə yolverilməzdir və bütün beynəlxalq hüquq normalarının kobudcasına pozulması deməkdir”.
İsveçdəki soydaşlarımız yazırlar ki, Azərbaycanın torpaqlarının 20 faizini Ermənistanın işğal etməsi və nəticədə Azərbaycanın tarixi abidələrinin vəhşicəsinə dağıdılması məlum faktdır. Ermənilər Qafqaz Albaniyası dövründən qalmış qədim Azərbaycan abidələrinin bir qismini məhv edib, bir qismini isə özününküləşdiriblər: “Ermənlərin Nor-Jugha adlandırdığı Culfa adlı Azərbaycan ərazisində hər hansı erməni tarixi və ya mədəni abidəsi olmayıb. Həmin ərazidə yerləşən daş abidələr isə Azərbaycan xalqının əcdadları olan albaniyalılara məxsusdur. “Erməni xaçkarları” məqaləsinin sessiyada müzakirə üçün təsdiq olunması Cənubi Qafqazın bütün xalqlarının tarixi həqiqətlərinin saxtalaşdırılımasına göz yummağa bərabərdir. Sizdən xahiş edirik ki, 2010-cu il noyabrın 15-19-da keçiriləcək sessiyada “Armenian cross-stones” (“Erməni xaçkarlar”) məqaləsinin müzakirə olunmaması üçün səylərinizi əsirgəməyəsiniz”.