Azərbaycanda daha bir erməni əsiri saxlanılır

Bu barədə APA-ya qurumun Bakı ofisinin yayım şöbəsinin rəhbəri İlahə Hüseynova məlumat verib. Onun sözlərinə görə, görüş noyabrın 5-də baş tutub. BQXK nümayəndələri Azərbaycanda saxlanılan 6 hərbi əsir və 6 mülki şəxsə baş çəkib, onların saxlanma şəraiti və fiziki durumu ilə maraqlanıblar.

Qeyd edək ki, Azərbaycanda saxlanılan 6 mülki şəxsdən 5-i bir ailənin üzvüdür. Digər mülki şəxsin adı isə hələlik açıqlanmır. Onun nə vaxt və hansı şəraitdə Azərbaycan tərəfə keçməsi də məlum deyil.

Xatırladaq ki, hazırda Azərbaycanda 6 hərbi əsir və 6 mülki Ermənistan vətəndaşı saxlanılır. Ermənistan vətəndaşları olan Yeğişe, Ruzanna, Alfred, Qayane və Petros Gevorkyanlar bir ailənin üzvləridir. Onlar bu ilin yanvarında Azərbaycan tərəfə keçiblər. Əsirlərdən 3-ü (Qrant Markosyan, Alik Tevosyan və Artur Sarkisyan) 2009-cu ilin fevralında, 2-si (Ohan Arutunyan və Gevorq Tovmasyan) 2009-cu ilin mayında, 1-i (Karen Arutunyan) isə həmin ilin iyulunda Azərbaycan tərəfə keçib.