Müxalifət partiyalarının liderləri səs veriblər

APA-nın məlumatına görə, səsvermədən sonra jurnalistlərə açıqlamasında Əli Kərimli deyib ki, bu seçkidə onun təmsil etdiyi blokun namizədi və dəstəklədiyi 50-yə qədər müxalifətçi deputatlığa namizəd kimi iştirak edir: “Buna görə də biz öz tərəfdarlarımızı seçkiyə gəlməyə çağırmışıq. Seçki günündə müəyyən irəliləyişlərin olmasını istəyirik”.

AXCP sədri qeyd edib ki, artıq AXCP-Müsavat siyasi partiyalar blokunun seçki qərargahı seçkinin gedişi ilə bağlı iki bülleten yayıb: “Hər yerdə seçkiləri ciddi müşahidə edirik, müşahidəçilərimiz var. Bütün qanun pozuntuları dəqiqliklə təsbit olunacaq. İstəyirik ki, qanun pozuntuları nəticəyə təsir göstərməsin”.

Müsavat Partiyasının başqanı İsa Qəmbər isə 20 saylı Nərimanov seçki dairəsinin 23-cü məntəqəsində səs verib. İsa Qəmbər seçki prosesini izlədiyini deyib. O, səsvermənin gedişində qanun pozuntularının baş verməsi barədə məlumatlar aldıqlarını deyib.
Seçki məntəqəsinə ən tez gələn Böyük Quruluş Partiyasının sədri Fazil Mustafa olub. O, saat 8:30-da 27 saylı Sabunçu İkinci Seçki Dairəsinin 2 saylı məntəqəsində səs verib.

Ümid Partiyasının sədri İqbal Ağazadə saat 11:40-da 19 saylı Nərimanov Birinci Seçki Dairəsinin 7 saylı məntəqəsində, Demokratik İslahatlar Partiyasının sədri Asim Mollazadə saat 12:15 radələrində 22 saylı Nəsimi İkinci Seçki Dairəsinin 25 saylı məntəqəsində səs veriblər.

Vətəndaş və İnkişaf Partiyasının sədri Əli Əliyev isə hələ səs verməyib. Əli Əliyev bildirib ki, gün ərzində 15 saylı Yasamal Birinci Seçki Dairəsindəki məntəqələrin birində səs verəcək.