“Ədalət naminə dostunu işarələ”

Dialoq və Əməkdaşlıq Uğrunda İslam Konfransı Təşkilatı Gənclər Forumunun (İKGF) mədəniyyətlərarası dialoq üzrə baş koordinatoru Leyla Əliyevanın təşəbbüsü ilə həyata keçirilən “Xocalıya ədalət” kampaniyası çərçivəsində növbəti aksiya başa çatıb.
İKGF-nin Bakı Ofisindən Lent.az-a verilən məlumata görə, “Facebook” səhifəsində start götürmüş “Ədalət naminə dostunu işarələ” adlı qlobal aksiyanın üçüncü mərhələsi uğurla başa çatıb.
Aksiya nəticəsində 4 gün ərzində 5000-dən çox insan “Xocalıya ədalət” kampaniyasının “Facebook” səhifəsinin qonağı olub, 460 nəfər öz dostunu işarələyib. Eyni zamanda bu aksiya çərçivəsində “Save Darfur” (“Darfuru xilas et”) kampaniyasına da maliyyə dəstəyi göstərilib.
Aksiyanın məqsədi “Facebook” sosial şəbəkəsinin verdiyi imkanlardan istifadə etməklə Xocalı soyqırımı haqqında həqiqətləri daha geniş beynəlxalq auditoriyada, xüsusilə “Facebook”un 500 milyon istifadəçisi arasında yaymaqdır. Kampaniyanın növbəti mərhələsi “Ədalət naminə Dostunu işarələ, Qlobal İstiləşməni dayandır” adlanacaq, dördüncü mərhələ noyabrın 1-də başlanacaq.