Azərbaycan və Ukrayna prezidentlərinin təkbətək görüşü keçirilir

APA-nın “UNİAN”a istinadən yaydığı məlumata görə, Azərbaycan və Ukrayna prezidentləri Kiyevin Şərəf Meydanında naməlum əsgərin abidəsi önünə əklil qoyublar. Prezidentlər həmçinin Ukraynada Qolodomor qurbanlarının xatirəsini yad etmə mərasimində iştirak ediblər.

Daha sonra Azərbaycan prezidentinin rəsmi qarşılanma mərasimi keçirilib. Ukrayna Silahlı Qüvvələrinin Fəxri Qarovulunun hərbçiləri prezidentləri qarşılayıb. Azərbaycan və Ukraynanın dövlət himnləri səsləndikdən sonra Azərbaycan prezidenti fəxri qarovulda dayanan əsgərləri salamlayıb. Hərbçilər dövlət başçıları və iki ölkənin nümayəndə heyətlərinin qarşısında təntənəli keçid ediblər.

Hazırda Azərbaycan və Ukrayna prezidentlərinin təkbətək görüşü başlayıb. Görüşdən sonra Azərbaycan-Ukrayna Prezidentlər Şurasının iclası keçiriləcək, ikitərəfli əməkdaşlığa dair sənədlər imzalanacaq və dövlət başçıları jurnalistlərin suallarını cavablandıracaqlar.

İmzalanacaq sənədlər arasında Prezidentlərin Birgə Bəyannaməsi və iki ölkənin xarici siyasət idarələri arasında arxiv işi sahəsində əməkdaşlıq barədə hökumətlərarası saziş də var.

Azərbaycan prezidentinin həmçinin səfər çərçivəsində baş nazir Nikolay Azarov və Ali Radanın sədri Vladimir Litvinlə də görüşləri nəzərdə tutulur.