“Fars”ın 3 gündə iki “səhvi”

Lent.az-ın Güney Azərbaycan Qurtuluş Partiyası mətbuat xidmətinə istinadən yaydığı xəbərdə bildirilib ki, “Azərbaycan Respublikasının mədəniyyət və turizm nazirinin İrana səfəri” başlıqlı məlumatında Respublikamızın dövlət bayrağının yerinə İranda Azərbaycan türklərinin milli haqları uğrunda mübarizə edən təşkilatlardan birinin - Güney Azərbaycan Milli Oyanış Hərəkatının simvolu qoyulub.

Xatırladaq ki, srağagün Tehranda keçirilən “Azərbaycan Respublikası-2010: bölgədə və ondan kənar rolu” beynəlxalq konfransında Azərbaycan Respublikasının Tehrandakı fövqəladə və səlahiyyətli səfiri Cavanşır Axundovun çıxışını yayan “Fars” agentliyi eyni “səhvi” etmişdi.

Yeri gəlmişkən, bu informasiya vasitəsi İran İslam Respublikası İslam İnqilab Keşikçiləri Qvardiyasının himayəsi altındadır.

Qeyd edək ki, Azərbaycan Respublikasının mədəniyyət və turizm naziri Əbülfəs Qarayevin sentyabrın 25-də İranda başlayacaq Azərbaycan Mədəniyyət günlərində iştirak etmək üçün bu ölkəyə səfər edəcəyi gözlənilir.

Sədrəddin Soltan