“YES” Qlobal Gənclər Şəbəkəsinin yaranmasının 8 illiyi qeyd olunub

Millət vəkili Gülər Əhmədovanın Lent.az-a verdiyi məlumata görə, tədbirdə Bakıda səfərdə olan Latviyanın sabiq prezidenti xanım Vayra Vike-Freybe də iştirak edib.

YES-in Azərbaycan üzrə regional koordinatoru Rövşən Muradov təşkilatın fəaliyyət istiqamətləri barədə ətraflı məlumat verib. O deyib ki, Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın dəstəyi ilə ölkəmizdə “YES” qlobal təşkilatının regional bölməsi fəaliyyət göstərir.

Vayra Vike-Freybe Azərbaycanda gənclərə göstərilən qayğını və “YES” təşkilatının fəaliyyətini yüksək qiymətləndirib. Eks-prezident Avropada hazırda mövcud olan ən böyük problemin doğum hallarının azalması və ölüm hallarının artmasında olduğunu bildirib.

Millət vəkili Qənirə Paşayeva bu gün Azərbaycanın gənclər təşkilatlarının fəaliyyətinin ölkənin hüdudlarından kənara çıxdığını söyləyib. Millət vəkili “YES” kimi gənclər təşkilatının sayının çox olmasını və onların fəaliyyətinin daha da genişlənməsini arzulayıb.

Millət vəkili Gülər Əhmədova isə çıxışında qeyd edib ki, Azərbaycanda kifayət qədər geniş potensiala malik gənclər var. Onun sözlərinə görə, “YES” təşkilatı Azərbaycanda sağlam gəncliyin inkişafına böyük töhfə verib. Millət vəkili fəal gənclərin gələcəkdə Azərbaycan parlament seçkilərində namizədliyini irəli sürməsini tövsiyə edib: “Sizə Azərbaycanın tarixini yazmaqda uğurlar arzulayıram”.

Millət vəkili Gültəkin Hacıbəyli tədbir zamanı Azərbaycan gənclərini qətiyyətli, prinsipial görmək istədiyini bildirib.

Tədbirdə gənclər sahəsində aparılan işlərə görə Azərbaycan Ailə, Qadın və Uşaq Problemləri Dövlət Komitəsinin sədri Hicran Hüseynova, millət vəkilləri Qənirə Paşayeva, Gülər Əhmədova, “Azercell Telekom” şirkətinin prezidenti Əli Ağan, mügənni Tünzalə Ağayeva, o cümlədən Latviyanın sabiq prezidenti Vayra Vike-Freyberqaya fəxri diplomlar təqdim olunub.