Mövsümi saç tökülməsi normal haldır. Amma bəzən bu proses dayanmaq əvəzinə xroniki hala çevrilə bilər. Məsələ düşündüyünüzdən daha ciddi ola bilər. Bəs saç tökülməsi nə vaxt həqiqətən narahat etməlidir?
Lent.az xəbər verir ki, mütəxəssislərin fikrincə, əgər saç tökülməsi heç bir aydın səbəb olmadan 1 il ərzində davam edirsə, bu, orqanizmdə gedən müəyyən proseslərin göstəricisi ola bilər.
13 ildən çox təcrübəsi olan bərbər Mela-Lotus Liz saç tökülməsi və saç qırılması problemlərinə xüsusilə həssas yanaşdığını bildirib. O, davamlı saç qırılması yaşayan çoxsaylı qadına kömək etdiyini qeyd edib.
Mütəxəssisin sözlərinə görə, saç canlı bir strukturdur və əsasən keratindən ibarətdir. Keratin lifli zülaldır, eyni zamanda dırnaqlarda da olur və saçlara möhkəmlik və elastiklik verir. Saçın uzanması isə hər kəsdə fərqli ola bilən və genetikadan asılı olan 3 mərhələli dövr üzrə baş verir:
Saç böyümə dövrünün mərhələləri
1. Anagen mərhələsi (böyümə fazası) Orta hesabla 2–6 il davam edir.
2. Katagen mərhələsi (keçid fazası) Qısa mərhələdir, təxminən 2–3 həftə çəkir. Bu zaman saç follikulu yığılır və fəaliyyətini dayandırır.
3. Telogen mərhələsi (istirahət fazası) Təxminən 2–3 ay davam edir. Sonra saç təbii şəkildə tökülür və yerinə yenisi çıxır.
Mela-Lotus Liz bildirir ki, saç tökülməsi həddindən artıq olduqda artıq siqnal kimi qiymətləndirilməlidir. Xüsusilə də tökülmə 6–8 həftədən çox davam edirsə, saçın sıxlığında azalma hiss olunursa, saç ayrımı (probor) genişlənirsə, müəyyən yerlərdə seyrəkləşmə zonaları yaranırsa, bu hallar diqqətdən yayınmamalıdır.
Hansı hallarda həkimə müraciət etmək vacibdir?
Ekspert vurğulayır ki, saç tökülməsi qəfil başlayırsa və ya davamlı şəkildə artırsa, üstəlik aşağıdakı hallar müşahidə olunursa, mütləq həkimə müraciət etmək lazımdır: uzun müddətli stress, xroniki yorğunluq, bəzi autoimmun xəstəliklər və qida çatışmazlığı (xüsusilə dəmir, zülal, vitaminlər). Çünki səbəbi müəyyən etmək və vaxtında tədbir görmək problemin böyüməsinin qarşısını alır.
Mövsümi saç tökülməsi necə olur?
Mövsümi saç tökülməsi adətən bir neçə həftə davam edir və daha çox payızda və ya yazda müşahidə olunur. Bu dövrdə tökülmə müvəqqəti artır, gündə təxminən 100–150 saç teli tökülə bilər, başda keçəlləşmə və ya qalıcı seyrəklik yaranmır
Lakin tökülmə 2 aydan çox davam edərsə, xüsusilə də saçların sıxlığı nəzərəçarpacaq dərəcədə azalarsa, mütəxəssisə müraciət etmək tövsiyə olunur.
Saç tökülməsinin mümkün səbəbləri
Mütəxəssis qeyd edir ki, saç tökülməsi müxtəlif səbəblərlə bağlı ola bilər:
Androgenetik alopesiya – tədricən inkişaf edən, müəyyən zonalarda seyrəkləşmə ilə xarakterizə olunur
Autoimmun xəstəliklər – qəfil, bəzən ocaq-ocaq tökülməyə səbəb ola bilər
Anemiya və dəmir çatışmazlığı – güclü yorğunluqla birlikdə bütün baş boyunca diffuz tökülmə yarada bilər
Bu hallar fərqli yanaşma və müalicə tələb etdiyi üçün düzgün diaqnozun vaxtında qoyulması çox önəmlidir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
