Qeysəriyyə əməliyyatına görə 100-dən çox həkim cəzalandırıldı

Türkiyə qeysəriyyə əməliyyatı keçirən həkimlərə qarşı intizam tədbirləri görməyə başlayıb. Tibbi təşkilatların məlumatına görə, ölkə üzrə 100-dən çox mütəxəssis cəzalandırılıb və məcburi təlim keçmələri əmr edilib.

Lent.az-ın xarici mediaya istinadən məlumatına görə, ölkədə qeysəriyyə əməliyyatlarının yüksək nisbəti bu tədbirlərin görülməsinə səbəb olub.

Antalyada Tibb Palatası mama-ginekoloqların müvəqqəti olaraq işdən çıxarıldığını və xüsusi təlimlərə göndərildiyini elan edib.

Türkiyə Tibb Assosiasiyası hesab edir ki, bu cür sanksiyalar problemi həll etmir. Təşkilatın vitse-prezidenti professor Ayşe Gültekengil bildirib ki, qeysəriyyə əməliyyatlarının yüksək nisbəti səhiyyə sistemindəki sistemli problemlərlə bağlıdır.

Onun sözlərinə görə, Türkiyədə bu cür əməliyyatların nisbəti 60 faizi keçib. O, səbəb kimi həkimlərin iş yükünü, potensial məhkəmə iddialarından gələn təzyiqi və hamilə qadınlara tibbi yardımın təşkilinin xüsusiyyətlərini göstərib.

Gültekengil qeyd edib ki, ilkin tibbi yardım mütəxəssisləri və mamaların iştirakı ilə effektiv hamiləlik monitorinqi ağırlaşmaların baş vermə tezliyini və cərrahi müdaxiləyə ehtiyacı azalda bilər. Bununla belə, o əlavə edib ki, profilaktik qayğıya kifayət qədər diqqət yetirilməməsi və rahat vaginal doğuş üçün şəraitin olmaması da qeysəriyyə kəsiyi seçiminə təsir göstərir.

Tibb ictimaiyyətinin nümayəndələri problemin həkimləri cəzalandırmaqla deyil, hamiləliyin idarə olunması və doğuşun yaxşılaşdırılması ilə həll edilməsinə çağırırlar.