Keçmiş Milli Qəhrəmanı bıçaqlayan şəxsdən YENİ XƏBƏR

Goranboyda keçmiş Milli Qəhrəmanı bıçaqlayan Xaliq Məmmədovun cinayət işi üzrə ibtidai istintaq başa çatıb.

Lent.az-ın məlumatına görə, cinayət işi üzrə toplanan materiallar baxılması üçün Gəncə Ağır Cinayətlər Məhkəməsinə göndərilib. İş hakim Elmin Rüstəmovun icraatına verilib.

Qeyd edək ki, bıçaqlanma hadisəsi bu il sentyabrın 7-də Goranboy şəhəri Heydər Əliyev prospektində qeydə alınıb.

Keçmiş Milli Qəhrəman, 65 yaşlı Əkbərov Rasim Ağa oğlu bıçaqlanma diaqnozu ilə xəstəxanaya yerləşdirilib.

Məlumata görə, R.Əkbərovu bıçaqlayan şəxs Xaliq Məmmədov adlı gəncdir. O, polis tərəfindən saxlanılıb.

Faktla bağlı araşdırma aparılır.

Xatırladaq ki, R.Əkbərova 1992-ci ildə "Azərbaycanın Milli Qəhrəmanı" fəxri adı verilsə də, həbs olunandan sonra 2001-ci ildə bu addan və "Azərbaycan Bayrağı" ordenindən məhrum edilib.

O, dövlət çevrilişinə cəhddə günahlandırılmış və 15 illik həbs cəzası almışdı.