Bakıda ötən gün törədilən qətllə bağlı yeni fakt üzə çıxıb.
Lent.az-ın əldə etdiyi məlumata görə, paytaxtın Nərimanov rayonunda bıçaqlanaraq öldürülən 20 yaşlı Hikmət Kərimov Azərbaycan Dövlət Bədən Tərbiyəsi və İdman Akademiyasının tələbəsi olub.
***
24 iyun saat 07:29
Bakıda 20 yaşlı gənci öldürən şəxsə cinayət işi açılıb.
Lent.az xəbər verir ki, bu barədə Nərimanov Rayon Prokurorluğu məlumat yayıb.
Bildirilib ki, iyunun 23-ü saat 23 radələrində 2003-cü il təvəllüdlü Hikmət Kərimovun kəsilmiş-deşilmiş xəsarətlərdən xəstəxanada ölməsi barədə rayon prokurorluğuna məlumat daxil olub.
Aparılmış araşdırmalarla 2005-ci il təvəllüdlü Fateh Məmmədovun Nərimanov rayonu ərazisində aralarında yaranmış mübahisə zamanı Hikmət Kərimova kəsici-deşici alətlə xəsarətlər yetirərək qəsdən öldürməsinə əsaslı şübhələr müəyyən edilib.
Faktla bağlı Nərimanov rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.
İbtidai istintaq davam etdirilir.
***
Saat 04:33
Bakıda 20 yaşlı gənci qətlə yetirən şəxs saxlanılıb.
Lent.az xəbər verir ki, bu barədə DİN məlumat yayıb.
Qeyd olunub ki, cinayət əməlini törətməkdə şübhəli bilinən 2005-ci il təvəllüdlü Məmmədov Fateh Vəkil oğlu polis əməkdaşları tərəfindən müəyyən olunaraq saxlanılıb.
Hadisə şəxsi münasibətlər zəminində baş verib.
Araşdırma aparılır.
***
Saat 00:25
İyunun 23-də saat 23 radələrində Nərimanov rayonu, Hidayətzadə küçəsində 20 yaşlı Kərimov Hikmət İlham oğlunun kəsilmiş-deşilmiş xəsarətlərdən ölməsi barədə polisə məlumat daxil olub.
Daxili İşlər Nazirliyinin mətbuat xidmətindən Lent.az-abildirilib ki, cinayət əməlini törətməkdə şübhəli bilinən şəxsin, yaxud şəxslərin tutulması istiqamətində polis əməkdaşları tərəfindən tədbirlər görülür.
Əlavə məlumat veriləcəkdir.