Sosial ipoteka da başlayır
18 iyun 2009 13:45 (UTC +04:00)

Sosial ipoteka da başlayır

Güzəştli şərtlərlə ipoteka krediti almaq hüququna malik olanlar bu gündən müvəkkil banklara müraciət edə bilər

Bu gündən etibarən ölkədə güzəştli ipoteka kreditlərinin verilməsinə başlanır. Güzəştli ipoteka kreditini almaq istəyən vətəndaşlar qeyd olunan tarixdən müvəkkil kredit təşkilatlarına müraciət edə bilərlər.

Azərbaycan İpoteka Fondunun mətbuat xidmətindən Lent.az-a bildiriblər ki, 2009-cu il Dövlət büdcəsində güzəştli ipoteka kreditləri üçün nəzərdə tutulmuş 14 milyon manat vəsaitin bir hissəsi fondun hesabına köçürülüb.

Fondda bildirirlər ki, güzəşti ipoteka kreditləri illik 4 faiz olmaqla 30 il müddətinə verilir. Bu şərtlərlə verilən kreditin maksimum məbləği 35 min manatdır. Belə kreditlər yaşı 35-i keçməyən və xüsusi güzəştli təbəqəyə daxil olan gənc ailələr üçün nəzərdə tutulub. Bu təbəqələrə şəhid ailəsinin üzvləri, milli qəhrəmanlar və onun ailə üzvləri, məcburi köçkünlər, dövlət qulluqçuları, elmi işçilərə, hərbçilərə və xüsusi xidmətləri olan idmançılar daxildir.

Adi kreditlərdə olduğu kimi, güzəştli ipoteka kreditlərində də mənzilin dəyərinin 15 faizini borcalan əvvəlcədən ödəməlidir. İpoteka kreditləşməsi ilə alınan mənzil bank tərəfindən girov saxlanılır. Borc tam ödənildikdən sonra həmin əmlak girovluqdan azad olunur.

Elxan SALAHOV
# 513

Oxşar yazılar