1082 kiloqram polietilen torbaların satışı dayandırıldı

İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Bakıda saxta polietilen torbaların satışının qarşısını alıb.

Nazirliyin mətbuat xidmətindən Lent.az-a bildiriblər ki, S.Əsgərova küçəsi-203 ünvanında Almazxan Qəhrəmanova məxsus mağazada aparılan yoxlama zamanı üzərində İranda istehsal edildiyi göstərilmiş “Reyhaneh”, “Sun shine”, “Parsa”, “Rozhina”, “Pilgoon” adlı 389 kiloqram polietilen torbaların uyğunluq və gigiyenik sertifikatlarının və müşayiətedici sənədlərinin olmadığı, 1 paketin içində 100 ədəd torbanın olmasının göstərildiyi halda, buradakı polietilen torbaların sayının 40-80 ədəd olduğu üzə çıxıb. 1082 kiloqram polietilen torbaların isə uyğunluq sertifikatının olmadığı müəyyən edilib.

Bununla əlaqədar, Dövlət Xidməti tərəfindən mənşəyi bəlli olmayan 389 kiloqram polietilen torbanın məhv edilməsi, uyğunluq sertifikatı olmayan 1082 kiloqram polietilen torbanın isə satışının dayandırılması barədə sahibkar Almazxan Qəhrəmanova icrası məcburi göstəriş verilib.

Elxan SALAHOV