“Unibank” lotereya aksiyasını başa vurdu

“Unibank” Kommersiya Bankı “VİSA” plastik kartlarının sahibləri üçün yay dövründə təşkil etdiyi “VİSA günləri” lotereya aksiyası çərçivəsində mükafatların sonuncu - üçüncü tirajını keçirib.

Bankdan Lent.az-a verilən məlumata görə, sentyabrın 1-də keçirilən sonuncu tirajda Türkiyəyə səyahətin sahibi daxil olmaqla, bütün qaliblər müəyyən edilib. Seçim Bankın Baş ofisində, avqust ayının 10-dan 31-dək bankomatlar, POS-terminallar və İnternet vasitəsilə 147 minə yaxın əməliyyat yerinə yetirmiş 3375 “VİSA” kart sahibləri arasında aparılıb. Bu zaman ən azı 20 AZN/USD/EUR/GBP məbləğində olan hər bir əməliyyat “Unibank” tərəfindən uduş üçün bir şans kimi qiymətləndirilmiş, mükafatların sahibləri isə təsadüfi kompüter seçimi üsulu ilə təyin edilib.

Beləliklə, “Unibank”ın 8 saylı, Şəki və Neftçilər filiallarının müştəriləri R.T.Ismayılova, M.Ə.Səfərov və C.S.Məmmədov “Canon A490” markalı rəqəmsal fotokameralara sahib olublar. Daha sonra, “VİSA” kartlarından fəal surətdə iştifadə edənlər arasında üç ədəd “I-pod” musiqi pleyerlərinin oynanılıb və onlar T.V.Həbibovaya, A.Ş.Məlikova və A.Ş.Mirmehdiyevə nəsib olub.

“VİSA günləri” aksiyasının üçüncü tirajının nəticələrinə görə Türkiyəyə bir həftəlik turun sahibi isə Bankın müştərisi A.M.Əsədov olub.