Qocalmağı özünə qadağan etdi: 78 yaşlı təqaüdçü necə rekordlar kitabına düşdü

Aberdindən olan Ket Boui Fortnite oynamağa 2017-ci ildə başlayıb. Həmin vaxt onun 69 yaşı olub, indi 78 yaşındadır.

Lent.az xarici mediaya istinadən xəbər verir ki, o, rəsmi olaraq dünyada Fortnite yayımlayan ən yaşlı qadın strimerdir.

Nəvəsi şübhə edirdi, nənə isə sübut etdi

Ket Bouinin nəvəsi Fortnite oynayırdı. O isə sadəcə baxırdı. Bir müddət sonra özü də oynamağı sınamaq istəyib.

Hesabını 2018-ci ildə yaradıb.

İlk aylar onun üçün asan olmayıb. Çünki oyun əsasən sürətli reaksiya tələb edir və daha çox yeniyetmələrin oynadığı oyun kimi tanınır.

Amma Ket geri çəkilməyib. Əksinə, canlı yayım açmağa başlayıb.

grumpygran48: “deyingən nənə” necə 24 min izləyici topladı?

Kanalın adını onun nəvəsi düşünüb. “Grumpy Gran” ifadəsi “deyingən nənə” mənasını verir. Əvvəlcə bu, ailə daxilində bir zarafat olub. İndi isə Twitch-də 24 mindən çox izləyicisi olan tanınmış bir ada çevrilib.

İnsanlara yaşlı bir qadının adətən yeniyetmələrlə assosiasiya olunan oyunu öyrənməsi və oynaması maraqlı gəlir.

Burada stereotipləri dağıdan bir rəqəm də var: Ket artıq 9 ildir eyni oyunu oynayır. Doqquz il. Bir çox yeniyetmə "Fortnite"dan bir neçə aya bezib uzaqlaşır. Ket isə oyunu buraxmayıb.

Guinness World Records Gamer's Edition 2027

Ket videooyunlara həsr olunmuş xüsusi rekord nəşrinə daxil edilib. Söhbət Ginnesin ümumi rekordlar kitabından deyil, məhz oyunçular üçün hazırlanmış xüsusi buraxılışdan gedir.

Onun rekordu belə təqdim olunub: Fortnite yayımlayan ən yaşlı qadın strimer.

Sentyabrın 1-də Ketin 78 yaşı tamam olub. Rekord da ad günü üçün xüsusi hədiyyəyə çevrilib. O, izləyicilərinə “Hədəf 80-dir!” deyib.

Bir çox insanın bu yaşda sağlamlıq və gündəlik problemlərdən danışdığı halda Ket qarşıdakı iki il üçün plan qurur. Üstəlik, bu planlar xəstəxana və ya poliklinika ilə deyil, onlayn dünya ilə bağlıdır.