Tovuzda maşında yanıb ölən hərbçilərin adı açıqlandı - YENİLƏNİB

Tovuz rayonunda baş verən ağır yol qəzasında yanaraq ölən hərbçilərin adı açıqlanıb.

APA-nın qərb bürosunun məlumatına görə, “Ford” markalı yük avtomobili ilə “Mercedes” markalı minik avtomobili toqquşması nəticəsində “Mercedes”in sürücüsü, N saylı hərbi hissənin zabiti, İsmayıllı rayon sakini, 1986-cı il təvəllüdlü Nəzərov Elçin Tağı oğlu və sərnişin, həmin hərbi hissədə müddətdən artıq hərbi xidmət edən Tovuz rayon Yuxarı Öysüzlü kənd sakini, 1983-cü il təvəllüdlü Zeynalov Elçin Zakir oğlu yanaraq dünyalarını dəyişiblər.

“Ford”un sürücüsü, Gəncə şəhər sakini, 1947-ci il təvəllüdlü Məmmədov Saleh Əziz oğlu isə ağır vəziyyətdə Tovuz rayon Mərkəzi Xəstəxanasına yerləşdirilib.

Faktla bağlı Baş Dövlət Yol Polisi İdarəsində araşdırma aparılır.

***

10.45

Tovuzda baş verən yol qəzasında yanaraq ölən şəxslər hərbçiymiş

Azərbaycanın Tovuz rayonunda baş verən yol qəzasında yanaraq ölən şəxslərin hərbçi olduqları məlum olub.

APA-nın məlumatına görə, “Mercedes” markalı avtomobildə yanaraq ölən şəxslərin hərbçi olduğu təsdiqlənsə də, onların şəxsiyyəti hələlik açıqlanmır.

Müdafiə Nazirliyinin mətbuat xidmətindən APA-ya faktı təsdiqləyiblər.

Bildirilib ki, yaxın saatlarda yol qəzasında həlak olan hərbçilərin adları açıqlanacaq.

***

09.51

Tovuzda ağır yol qəzası: sürücü və sərnişin yanıb öldü

Tovuzda ağır yol qəzası olub. Lent.az-ın FHN-in saytına istinadən verdiyi məlumata görə, Aşağı Ayıblı kəndində "Ford" markalı yük avtomobili ilə "Mercedes" markalı minik avtomobilinin toqquşması nəticəsində yanğınla nəticələnən yol-qəza hadisəsi baş verib. Yanğın nəticəsində minik avtomobilinin yanar hissələri yanıb. Yanğının kəşfiyyatı zamanı "Mercedes" avtomobilində olan sürücünün və sərnişinin meyiti aşkar olunub. Digər avtomobil yanğından mühafizə edilib. Yanğın saat 07:50-də yanğınsöndürənlər tərəfindən söndürülüb.