15 yaşlı yeniyetmə dayısının maşınında qəza törətdi

Dünən Xəzər rayonunun Türkan qəsəbəsi ərazisində yol-nəqliyyat hadisəsi baş verib.

Lent.az Daxili İşlər Nazirliyinin ( DİN ) saytına istinadən xəbər verir ki, dünən saat 13 radələrində Xəzər rayonunun Türkan qəsəbəsi ərazisində Bakı şəhər sakini 15 yaşlı İbrahim Abbasov dayısına məxsus “Saipa” markalı avtomobili idarə edərkən onu yolun kənarındakı hasara vurub. Sürücü hadisə nəticəsində yerindəcə ölüb.

Faktla bağlı Xəzər RPİ tərəfindən araşdırma aparılır.

Bundan başqa, dünən axşam saat 22 radələrində Yasamal rayonunun Moskva prospektində də qəza baş verib.

Bakı şəhər sakini Elvin Bağırov idarə etdiyi “VAZ-2106” markalı avtomobillə yolu keçən paytaxt sakini Əfruzə Xudiyevanı vurub. Xəstəxanaya yerləşdirilən piyada orada ölüb.

Faktla bağlı Yasamal RPİ tərəfindən araşdırma aparılır.

Fevralın 7-də saat 7 radələrində Binəqədi qəsəbəsində Abşeron rayon sakini Fikrət Balakişi oğlu idarə etdiyi “Mercedes” markalı avtomobillə yolu keçərkən vurulan Bakı şəhər sakini Sədaqət Yusifova isə dünən yerləşdirildiyi xəstəxanada dünyasını dəyişib.

Bu faktla bağlı da araşdırma aparılır.