Türkiyədə restoran sahibi azərbaycanlı qadının üstünə benzin töküb od vurdu

42 yaşlı ofisiant qadının üzərində əməliyyat aparılıb

Türkiyənin Əskişəhər vilayətində restoran sahibi azərbaycanlı qadını yandırmağa cəhd edib.

Lent.az-ın “hurriyet”ə istinadən məlumatına görə, 40 yaşlı restoran sahibi yanında ofisiant işləyən azərbaycanlı qadını öldürmək istəyib. Hadisə bu gecə yerli vaxtla 04.00 radələrində baş verib. Spirtli içkinin sərbəst olduğu restoranın sahibi Nihad Xoruzla azərbaycanlı ofisiant, 42 yaşlı Muxmənat Abdullayeva arasında mübahisə olub. Nəticədə restoran sahibi qadının üstünə benzin tökərək alışqanla od vurub.

Restoran işçiləri dərhal müdaxilə edərək, alovu söndürüblər. Qadının paltarları yanıb, özü isə yanıq xəsarətləri alıb. Xəstəxanaya çatdırılan Abdullayevanın üzərində əməliyyat aparılıb, hazırda onun səhhəti qənaətbəxşdir.

Nihad Xoruz polisə aparılıb, ifadəsi alınandan sonra sərbəst buraxılıb.