Lent.az-ın 1 yaşı tamam oldu

2008-ci il 25 iyunda internet istifadəçilərinin görüşünə gələn Lent.az bu qısa müddət ərzində oxucuların həm etibarlı informasiya mənbəyinə, həm də sevimli dostuna çevrilə bildi. Maraqlı layihələri, eksklüziv xəbərləri, yenilikləri ilə ətrafına geniş oxucu kütləsi toplaya bilən Lent.az hazırda Azərbaycan dilli internet media resursları arasında liderdir. Bu nailiyyət isə təbii ki, yorulmaz fəaliyyətin, tərəfsizliyin və oxucu zövqünə xidmətin nəticəsidir.

Ötən bir il ərzində Lent.az-ın böyüməsi və tanınması üçün bizə yardımçı olmuş hər kəsə - həmkarlarımıza, oxucularımıza, dostlarımıza, ziyalı və sənətçilərimizə, siyasət və elm adamlarımıza, ölkədən və xaricdən bizə dəstəyini əsirgəməyən insanların hər birinə təşəkkürümüz var.

Lent.az-ın yorulmaz kollektivinə ayrıca təşəkkürlər. Bu bir ildə həm format, həm də ideya olaraq yeni bir media quruluşunu səhnəyə çıxarmaq, tanıtmaq, etimad qazandırmaq, sevdirmək məhz bu kollektivin əməyi sayəsində mümkün oldu. Bu işin ideya müəllifindən tutmuş, ən sonuncu işə qəbul olunan əməkdaşımıza qədər hər kəsin Lent.az-a verdiyi könül və zəhmət payını unutmuruq.

Qarşıda isə daha böyük işlər, daha geniş planlar dayanır. İnternet media orqanı olması baxımından, Lent.az yeni təşəkkül tapmaqda olan bu sahənin ilk qaranquşlarından sayılır. Hazırda yerli və beynəlxalq təşkilatların, media institutlarının bu sahəyə diqqət verməsi internet mediasının inkişaf perspektivlərinin geniş olduğunu, başqa sözlə, hələ işləməyə xeyli əsaslar olduğunu deməyə əsas verir.

Hələliksə bu günlərdə bizə təbriklərini əsirgəməyən hər kəsə təşəkkür, Lent.az-ın oxucularını, yaradıcılarını, dostlarını, rəqiblərini isə təbrik edirik!

Hər il bir addım qabağa!