Xamneyinin qohumu «oyundan» çıxdı

İranın ali rəhbəri ayətullah SeyidƏli Xamneyinin qudası, “2+1” seçki koalisiyasının üzvü Qulaməli Həddad Adil iyunun 10-da bəyanat yayaraq prezidentliyə namizədliyini geri götürdüyünü bildirib.

Lent.az-ın İranın informasiya vasitələrinə istinadən məlumatına görə, Qulaməli Həddad Adil yaydığı bəyanatda namizədliyini başqa bir namizədin xeyrinə geri götürməsi məsələsinə toxunmayıb: “Mən mühafizəkarların bu seçkidə qalib gəlməsinə yardım etmək məqsədilə namizədliyimi geri götürürəm. Seçicilərdən istəyirəm ki, ali rəhbərin (ayətullah Xamneyini nəzərdə tutur-red.) nəzərdə tutduğu meyarlara riayət edərək, islam inqilabının ideyalarına və onun dəyərlərinə önəm verən namizədlərə səs versinlər”.

“2+1” seçki koalisiyasını altı ay əvvəl İranın dini lideri ayətullah Əli Xamneyinin beynəlxalq məsələlər üzrə baş məsləhətçisi prezidentliyə namizəd Ələkbər Vilayəti, Xamneyinin qudası Qulaməli Həddad Adil və Tehranın hazırkı meri, prezidentliyə iddiaçı Məhəmmədbağır Qalibaf yaradı.