Qorxunc siyahı: ən təhlükəlilərin adları açıqlandı

Amerika Federal Təhqiqatlar Bürosu ən təhlükəli kibercinayətkarların adlarını açıqlayıb. ANS PRESS-in Rusiya mətbuatına istinadən verdiyi məlumata görə, axtarışda olan ən təhlükəli hakerlər siyahısına rusiyalı Aleksey Belan başçılıq edir. O, “Abirvalq”, “Fedyunya”, “Maq”, “M4G” ləqəbləri ilə məşhurdur. 26 yaşlı hakerin tutulması üçün ABŞ Federal Təhqiqatlar Bürosu 100 min dollar mükafat təklif edir.

Aleksey Belan 2012-ci ilin aprelindən 2013-cü ilə kimi bazası Nevada və Kaliforniyada olan üç nəhəng internet-mağazanı, onlara aid məlumatları və parolları sındırıb.

Amerikalı hakimlər Belanın həbsi üçün 2012-ci ilin sentyabrında və 2013-cü ilin iyununda iki order veriblər. Haker gizli məlumatların öyrənilməsi və şəxsi məlumatların oğurluğunda ittiham olunur. Onun haqqında məlumatda bildirilir ki, Rusiya vətəndaşı olan bu gənc Rusiya, Yunanıstan, Latviya, Maldiv və Tailandda gizlənə bilər.

Belandan başqa ən təhlükəli hakerlər siyahısına Rusiyadan daha üç nəfər düşüb. Onların arasında Artyom Semyonov da var. O, kiberdəstə yaratmaqda ittiham olunur. Bu dəstə Amerika banklarından 3 milyon dollar oğurlamaqda şübhəli bilinir. Onun yerini göstərən şəxsə 50 min dollar mükafat təklif olunur.

Digər rus haker Aleksandr Bobnevdir. O, 2013-cü ildə 350 min dollar pulu ABŞ bank hesablarından çıxarıb. Dördüncü hakerin isə Andrey Taame olduğu bildirilir. Onun yaydığı virus dünyanın müxtəlif ölkələrində 4 milyon kompüteri sıradan çıxarıb.