Mursi qubernatorları dəyişdi, Misir yenə qarışdı

Misir prezidenti Məhəmməd Mursi 17 yeni qubernator təyin edib.

Lent.az-ın İTAR-TASS agentliyinə istinadən verdiyi məlumata görə, bu təyinatdan sonra ölkənin 27 əyalətindən 8-ə islamçılar rəhbərlik edəcək.

Onların arasında keçmiş ekstremist qruplaşmaların da üzvləri var. Məhəmməd Mursi 5 əyalətə ordu generalını, 3 əyalətə müstəqil siyasətçini, bir əyalətə isə liberal yönümlü siyasətçini qubernator təyin edib.

Əhalinin ən çox narazılığına səbəb Luksor əyalətinə təyin edilən yeni qubernatorla bağlıdır. Qeyd edək ki, 1997-ci ildə bu əyalətdəki Xatşepsut məbədi yaxınlığında 58 xarici turist güllələnib. Bu terror aktını “Əl-Qamaa əl-islamiyə” qruplaşması təşkil edib. İndi Misir prezidenti bu qruplaşmanın üzvü olmuş Adel Əsəd Məhəmməd əl-Xayyat bu əyalətin qubernatoru təyin edib.

Luksor sakinləri artıq küçələrə çıxıb, bu təyinata etirazlarını bildirir, bunun yeni qətliam törətməklə eyni məna verdiyini bəyan edirlər.

Dakaxliya, Dumyat, İsmailiyyə, Minufiya əyalətlərinin sakinləri də yeni qubernator təyinatından narazıdırlar. “6 Aprel” Gənclər Təşkilatı bəyan edib ki, yeni qubernatorun Minufiya əyalətinə gəlişinin qarşısını almaq üçün canlı qalxan olacaqlar.