Misirdə Nizaminin abidəsi ucaldılacaq

Misirdə Nizami Gəncəvinin abidəsi ucaldılacaq. Lent.az-a Azərbaycanın Misir Ərəb Respublikasındakı səfirliyindən verilən məlumata görə, bu barədə Azərbaycanın prezidenti İlham Əliyev tapşırıq verib. Tapşırığa əsasən Azərbaycan dahi şairi Nizami Gəncəvinin abidəsinin Misirin dünya şöhrətli İsgəndəriyyə kitabxanasında ucaldılması üçün Xarici İşlər Nazirliyi, Azərbaycanın Misirdəki səfirliyi və Mədəniyyət və Turizm Nazirliyi tərəfindən həmin kitabxananın rəhbərliyi ilə danışıqlar aparılıb və bu barədə razılıq əldə olunub.

Azərbaycanın Mədəniyyət və Turizm Nazirliyinin ekspertləri cari ilin iyunun 26- da İsgəndəriyyə kitabxanasında olub, abidənin hazırlanması üçün lazımı ölçüləri götürüb, abidənin yerləşdiriləcəyi yer və bundan irəli gələn digər texniki məsələlər müəyyən edilib.

Qeyd edək ki, İsgəndəriyyə kitabxanası il ərzində bir neçə milyon turist tərəfindən ziyarət olunur, dünya miqyasında tanınmış elm-mədəniyyət mərkəzlərindən biridir. Bu kitabxanada Azərbaycan şairinin abidəsinin ucaldılması Nizami irsinin ərəb aləmində və dünya miqyasında daha da əbədiləşdirilməsi işinə öz töhfəsini verəcək.