Dakar əvəzinə Dəkkəyə gedib çıxdılar - KURYOZ

Bir neçə ay əvvəl Türk Hava Yolları (THY) vasitəsi ilə Los- Anjelesdən İstanbula, ordan isə Seneqalın Dakar şəhərinə getməli olan amerikalı cütlüyün başına gələnlər dünya mediasında əks-səda doğurub. Lent.az-ın xarici mənbələrə istinadən verdiyi xəbərə görə, Kaliforniya Universitetində işləyən 31 yaşlı Sandi Valdiviezo və onun 39 yaşlı həyat yoldaşı Triet Vo yanlışlıq üzündən tamamilə başqa qitəyə gedib çıxıblar.

Məlum olub ki, İstanbuldan Afrika qitəsində yerləşən Seneqalın paytaxtına getməli olan gənc alimlər Banqladeşin paytaxtı olan Dəkkəyə gedib çıxıblar. Cütlük aylar sonra verdikləri müsahibədə əslində yanlışlığa özlərinin yol verdiyini deyiblər. Onlar bildiriblər ki, İstanbulda Dakar əvəzinə Dəkkəyə gedən təyyarəyə miniblər. Onlar vəziyyəti təyyarə səmaya qalxdıqdan xeyli sonra anlayıblar.

Hadisədən sonra THY təmsilçisi cütlüyə Dakara qayıtmaq üçün havayı bilet təşkil edib və 9 saat sonra onlar Dəkkədən Dakara qayıdıblar.