Casusluqda ittiham olunan keçmiş səfirə 15 il HƏBS CƏZASI

ABŞ-ın Argentina və Boliviyadakı keçmiş səfiri Manuel Roça 15 il müddətinə azadlıqdan məhrum edilib. Məhkəmə onu Kubanın xeyrinə kəşfiyyat fəaliyyətinə görə cəzalandırıb.

Lent.az xarici KİV-ə istinadla bildirir ki, Roça, casusluq da daxil olmaqla iki maddə üzrə hökmü qəbul edib və federal prokurorlara ifadə verməyə başlayıb.

İstintaq nəticəsində məlum olub ki, 73 yaşlı Roça 40 ildən artıqdır ki, Kuba Kommunist Partiyasına (KKP) gizli yardım edib və ABŞ-a qarşı casusluq edib. O, hətta ABŞ Dövlət Departamentində işləyərkən də bu əməllərini davam etdirib.

Roça 1981-ci ildən Dövlət Departamentində işləyir və Ağ Evin Milli Təhlükəsizlik Şurasının üzvü olub. Toxunulmazlığı ilə öyünən keçmiş diplomat 2023-cü ilin dekabrında saxlanılıb. Onun barəsində 15 il müddətinə həbs cəzası seçilib.

ABŞ Ədliyyə Departamentinin sözçüsü Devid Nyuman deyib ki, hökm yüksək rütbəli məmurun illərlə xəyanətinə son qoyub.