“Facebook” Suriyada inqilab edə bilmir

Lent.az-ın “Mignyus”a istinadən məlumatına görə, Suriya paytaxtı Dəməşqdə cümə namazından sonra əhalinin “qəzəb günü” aksiyasına çıxacağı gözlənilirdi.

Ötən bir həftə ərzində suriyalı fəallar Misir təcrübəsinə əsaslanaraq, tərəfdarlarını “Facebook” vasitəsi ilə hakimiyyət əleyhinə etiraz tədbirinə çağırırdılar.

Şəbəkədə 12 min nəfər etiraz aksiyasında iştirak edəcəyini təsdiqləmişdi. Fevralın 4-də Dəməşqin küçələrində tam sakitlik və boşluq müşahidə edilib. Ancaq şəhərin mərkəzi küçə və meydanlarında təhlükəsizlik xidməti əməkdaşlarının sayı adi günlərdəkindən çox olub.

Suriya İnsan Haqları Liqasının prezidenti Əbdül Rihavinin sözlərinə görə, suriyalı dissidentlər çağırışa qarşılıq verməyib: “Onlar indiki şəraitdə etiraz aksiyalarının səmərəliliyinə inanmadıqlarını bildiriblər”.

Fevralın 3-də “Tələbələr, fəhlələr və yoxsul təqaüdçülərlə həmrəylik” tələbi ilə parlamentin binası qarşısında keçirilməsi nəzərdə tutulan nümayiş də baş tutmamışdı.

“Human Rights Watch”-ın məlumatına əsasən, Suriyanın xüsusi xidmət orqanları belə tədbirlərdə iştirakçıların hər birinin şəklini çəkir, sənədləri yoxlayırlar. Cümə aksiyasının təşkilatçılarından biri, Süheyra Attasinin sözlərinə görə, təhlükəsizlik xidmətinin təmsilçiləri ötən həftə onun ailəsi ilə əlaqə saxlayıb, fəaliyyətini dayandırmasını israrla “məsləhət” görüblər.

Sədrəddin Soltan