Başına 13 sm-lik ağac parçası batdığını 6 ay sonra bildi...

Lent.az-ın Rusiya mətbuatına istinadən verdiyi məlumata görə, 6 ay əvvəl həyət evində ağac budayan Vladimir Bitnevin ayağı sürüşüb və yıxılıb. Huşunu itirən Vladimir Bitnevi həyat yoldaşı xəstəxanaya aparıb. 3 gün koma vəziyyətində qalan Vladimir Bitnev özünə gələn zaman həkimlər hər hansı problem aşkarlamayıb və onu evə buraxıblar. 6 ay keçdikdən sonra Vladimir Bitnevin başı ağrımağa başlayıb və yanağı şişib. Yenidən həkimlərə müraciət edən Vladimir Bitnev rentgen müayinəsinə göndərilib. Müayinə zamanı onun başında 13 santimetr ağac parçası aşkarlanıb. Həkimlər bunu görən zaman şoka düşüblər.

Vladimir Bitnev şanslı sayılır. Çünki ağac parçası 2 millimetr də hərəkət etsəydi, o, görmə qabiliyyətini itirəcəkdi. Ağac parçasının Vladimir Bitnevin başından çıxarmaq üçün cərrahi əməliyyat keçirilib. Əməliyyat uğurla başa çatıb. Ağac parçası isə xəstəxananın muzeyində saxlanılır.