Tacikistanda xaricilərlə nikah məhdudlaşdırdı

Lent.az-ın “BBC”yə istinadən verdiyi məlumata görə, düzəlişə görə, ölkə vətəndaşlarına Tacikistanda 3 ildən az yaşayan xaricilərlə nikaha girmək qadağan edilir.

Hətta 3 ildən çox Tacikistanda yaşayan xarici ölkə vətəndaşı tacik xanımla ailə qurursa, bu halda nikah müqaviləsinə imza atmalıdır. Nikah müqaviləsinə görə həmin xarici ər tacik həyat yoldaşına Tacikistanda ev almalıdır.

Hökumət bu addımla əhalinin maraqlarını qoruduğunu bəyan edib. Tacikistan ədliyyə nazirinin müavini Abdumannona Xolikova deyib ki, çoxlu sayda tacikin hüquqlarının pozulması ilə bağlı faktlar çoxdur. Buna görə də belə bir düzəlişin qəbuluna ehtiyac yaranıb.

Düzəlişin əleyhdarları isə hesab edirlər ki, bu addım qadınların ərə gedərək ölkədən kənara çıxmasının qarşısını alır. Məsələni qəlizləşdirən həm də Tacikistanda kişilərlə qadınlar arasında balansın pozulmasıdır. Ölkədə 1 kişiyə 3-4 qadın düşür. Buna səbəb də tacik kişilərin kütləvi surətdə ölkəni tərk edərək Rusiya və Qazaxıstana işləməyə getmələri, çox vaxt da orada qalmalarıdır. Ona görə də hüquq müdafiəçiləri hesab edirlər k, yeni düzəliş qadınların ər tapmaları ilə bağlı ümidlərini puça çıxaracaq.