Qurban bayramında namaz qılan müsəlmanları yumurtaya tutublar

Noyabrın 16-da Afinanın mərkəzi meydanlarından birində Qurban bayramı münasibəti ilə namaz qılan müsəlman-immiqrantlara yumurta atılıb. Lent.az-ın “Reuters” agentliyinə istinadən verdiyi məlumata görə, müsəlmanları onlarla afinalı yumurtaya tutub.

Afinanın bir neçə yerli sakini Yunanıstan bayrağını qaldırıb, öz eyvanlarından müsəlmanlara rişxənd edib, meydana müsəlmanların murdar saydıqları donuzun şəkli olan vərəqlər atıblar.

Banqladeşdən olan 30 yaşlı miqrant deyib ki, meydanın yaxınlığında qeyri-rəsmi fəaliyyət göstərən məscidləri var, ancaq ora getməyə qorxurlar: “Bəzən qonşuluqda yaşayan yunanlar bizi ölümlə hədələyirlər”.

Bu meydan yaxınlığındakı binalardan birində yaşayan 35 yaşlı yunan isə əksinə, müsəlmanlardan qorxduqlarını söyləyib: “35 ildir ki, burada yaşayıram. Ancaq indi müsəlman-miqrantların axını ilə əlaqədar buradan köçməyə hazırlaşıram”.

Afina Universiteti yaxınlığındakı digər meydanda isə 2 min müsəlman sakit şəraitdə bayram namazı qılıb.

Hazırda Yunanıstanda 1 milyona yaxın müsəlman yaşayır, ancaq onların indiyə qədər 1 qanuni məscidləri belə yoxdur. Buna görə də müsəlmanlar dini bayramlar vaxtı mədəniyyət mərkəzlərində, yaxud şəxsi evlərdə namaz qılmaq məcburiyyətində qalırlar. Yunanıstan hakimiyyəti az əvvəl paytaxt yaxınlığında bir məscidin tikintisinə razılıq verib.