İtaliyada mini-yubkaya qadağa

İctimai əxlaq standartlarını yüksəltmək üçün İtaliyanın cənubundakı Katellamare-di-Stabia kurort şəhərində qısa yubkaların və digər açıq-saçıq paltarların geyilməsinə qadağa qoyulacaq. Lent.az-ın “BBC”yə istinadən verdiyi məlumata görə, sağ-mərkəz yönümlü Xalq Azadlığı Partiyasının təmsilçisi olan şəhərin meri Luici Bobbio deyib ki, onun məqsədi vulqar açıq-saçıqlıqdan, yaxud özünü pis aparanlardan insanların canını qurtarmaqdır.

Mer bildirib ki, yeni qaydalar şəhər etikasının bərpasına və vətəndaş cəmiyyətinə kömək edəcək. Luici Bobbionun əsas şüarı odur ki, hədsiz açıq-saçıqlıq lazım deyil. Belə görünür ki, şəhər meri tək qısa yubkalara deyil, dar cinslərə də qadağa qoymaq barədə fikirləşir.

Katellamare-di-Stabia şəhərində çimərlikdən kənar özünü günəşə vermək, ictimai yerdə futbol oynamaq, küfr danışmaq da qadağan olunacaq. Bu qaydaları pozanı isə 25-500 avro aralığında cərimə gözləyir.

Din adamları da bu qadağaları səbirsizliklə gözləyirlər. Şəhər kilsəsinin nümayəndəsi don Paul Çeçere deyib ki, bu, həm də seksual kələklərlə bağlı artan problemlərlə mübarizə yoludur.