Qırğızıstan yenə qaynayır

Qırğızıstanın Ata Yurt Partiyasının lideri Kamçıbek Taşıyev sui-qəsd cəhdinə məruz qaldığını bildirib. Lent.az-ın “trt.net.tr” saytının Azərbaycan versiyasına istinadən verdiyi məlumata görə, iki həftə öncə keçirilən seçkilərin qalibi olan Kamçıbek Taşıyev bu gün keçirdiyi mətbuat konfransına əli sarıqlı və üzərində qan ləkələri olan köynəklə gəlib.

O, evinin qarşısında sui-qəsd cəhdinə məruz qaldığını söyləyib. Kamçıbek Taşıyevin bu açıqlamasından sonra paytaxt Bişkekdə yüzlərlə insan küçələrə çıxıb. Nümayişçilər Milli Kəşfiyyat Təşkilatının rəhbərinin istefasını və 10 oktyabr seçkilərinin yekun nəticələrinin açıqlanmasını tələb ediblər.

Qırğızıstan hüquq-mühafizə orqanları hələlik iddia ilə bağlı rəsmi açıqlama verməyib. Ədliyyə nazirinin müavini Aybek Turqunbayev Kamçıbek Taşıyevin öz mühafizəçilərinin səbəb olduğu toqquşmada yaralanmış ola biləcəyini söyləyib.