Avropa Parlamenti Kipr türklərini üzən qərar verdi

Avropa Parlamentinin Hüquq Komitəsi Avropa Birliyi və Şimali Kipr Türk Cümhuriyyəti (ŞKTC) arasında ticarətin başlamasını nəzərdə tutan layihənin “qanuni əsası olmadığı”na qərar verib.

Lent.az-ın Türkiyənin NTV telekanalına istinadən verdiyi məlumata görə, Hüquq Komitəsinin bu qərarı ilə Avropa Birliyi ölkələrinin 6 il əvvəl ŞKTC-yə ticarət əlaqələrinin qurulması ilə bağlı verdikləri vəd boşa çıxıb.

Qeyd edək ki, Yunan Kiprinin vetosunu aşmaq üçün Avropa Komissiyası Avropa Parlamentinin Hüquq Komitəsinə müraciət edib. Ancaq Hüquq Komitəsi Kipr türklərinin yalnız yunanların razılığı ilə Avropa Birliyi ölkələri ilə ticarət əlaqələri qura biləcəyini vurğulayıb.

Hüquq Komitəsində yaşıllar və liberallar istisna ilə, digər siyasi qüvvələri təmsil edən avropalı deputatlar yunanların lehinə səs veriblər. Layihə yenidən işlənmək üçün geri qaytarılıb. Ancaq bu halda da son nəticədə layihənin qəbulu üçün hamının səs verməsi lazımdır. Kipr yunanlarının təmsilçilərinin bunun əleyhinə çıxacağı və layihənin yeni variantının da qəbul olunmayacağı öncədən aydındır.

ŞKTC prezidenti Derviş Eroğlu Avropa Parlamenti Hüquq Komitəsinin qərarına sərt reaksiya verib. O deyib ki, bu qərarla Kiprin türk xalqı ilə Avropa Birliyi arasında etimad böhranı yaranıb və Avropa Kipr probleminin çözülməməsinə faktiki siyasi dəstək verib: “Kipr türklərini 6 il boş yerə gözlədiblər. Bu, Avropa Birliyinin acizliyini və BMT-nin vasitəçiliyi ilə aparılan danışıqlara müsbət töhfə verə bilməyəcəyini göstərib”.