Bakıda “Hz. Peyğəmbər və Onun əxlaqı” konfransı keçirilib

Bakı şəhərində “Hz. Peyğəmbər və Onun əxlaqı” adlı konfrans keçirilib.

Dünən Bakı şəhərində “Yeni Üfüq” Mənəvi İrsin Təbliği İctimai Birliyinin təşkilatçılığı ilə “Hz. Peyğəmbər və Onun əxlaqı” adlı konfrans keçirilib.

Lent.az-ın məlumatına görə, tədbirdə ilk olaraq Qazi Qarabağ azanı dinlənilib. Daha sonra tədbirin aparıcısı, "Yeni Üfüq" İctimai Birliyinin fəalı Saniyə Hüseynova sözü “Yeni Üfüq” İctimai Birliyinin sədri Sevinc Əzimbəyliyə verib. “Yeni Üfüq” İctimai Birliyinin sədri Sevinc Əzimbəyli “Hz.Peyğəmbər və Onun əxlaqı” mövzusunda geniş çıxış edib. O, Məhəmməd peyğəmbərin bütün insanlığa uca Yaradandan ilahi lütf olaraq göndərildiyini bildirərək, onun insanlıq üçün hər kəsə nümunə olmasını söyləyib. Birliyin sədri həmçinin, ölkəmizdə milli-mənəvi dəyərlərimizin həqiqi təəssübkeşinin Azərbaycan dövləti olduğunu xüsusi qeyd edib. O, dövlətin bu tolerant siyasətindən riyakarcasına sui-istifadə edən, məzhəblərarası münasibətlərin qızışdırılmasına şərait yaradan radikal dini cərəyanların fəaliyyətindən bəhs edərək, belə ziyanlı qüvvələrin zərərsizləşdirilməsi yolunda hər kəsi, xüsusilə fəal qadınları dövlətə dəstək verməyə çağırıb. Birliyin sədri son günlər ölkə başçısı İlham Əliyevin ailəsi ilə birlikdə müqəddəs ümrə ziyarətini inanclı ölkə insanları tərəfindən sevinclə qarşılandığını da tədbir iştirakçılarının diqqətinə çatdırıb.

Tədbirdə “Yeni Üfüq” İctimai Birliyinin sədr müavini, filologiya üzrə fəlsəfə elmləri doktoru Xanım Qasımova isə Peyğəmbər əxlaqından danışaraq, ölkə gənclərini Peyğəmbər əxlaqından bəhrələnərək əxlaqlı milli gəncliyə sahib durmağa, Vətənimizə və dövlətimizə xidmətdə hər zaman sadiq olmağa səsləyib.

Tədbirdə şəhid və qazi ailələri, çoxlu sayda tələbə gənclər iştirak edib.

Tədbirin sonunda “Yeni Üfüq” İctimai Birliyi adından xanımlara qızılgüllər hədiyyə edilib.