Geologiya İnstitutunun tədqiqatlarının nəticələri Vyanada nümayiş etdirilir

Avstriyanın paytaxtı Vyanada Nüvə Sınaqlarının Hərtərəfli Qadağan Edilməsi üzrə Müqavilə Təşkilatı (NSHQMT) tərəfindən “Elm və Texnologiya 2011” adlı beynəlxalq konfrans-sərgi keçirilir.

Məlumatı Azərbaycan Milli Elmlər Akademiyası Geologiya İnstitutunun mətbuat xidmətindən Lent.az-a verilən məlumata görə, iyunun 8-də başlamış tədbirdə Azərbaycan Milli Elmlər Akademiyası (AMEA) Geologiya İnstitutunun “Seysmik təhlükənin qiymətləndirilməsi baxımından Azərbaycanda seysmik monitorinqin aparılması” mövzusu üzrə tədqiqatlarının nəticələri də nümayiş etdirilir.

Dünyanın 500-dən çox aliminin toplaşdığı konfrans-sərgidə seysmologiya, nüvə tədqiqatları, geodinamika və digər sahələrə aid çıxışlar dinlənilib. Geologiya İnstitutuna məxsus təqdimat materiallarının müəllifləri geodinamika və seysmologiya şöbəsinin rəhbəri Fəxrəddin Qədirov və Gənc Alimlər Şurasının sədri Qulam Babayevdir. Qulam Babayevin çıxışı əsasında təqdim olunan tədqiqatlar və nəticələr tədbir iştirakçılarının, xüsusən də Yaponiya alimlərinin böyük marağına səbəb olub.

Qeyd edək ki, beynəlxalq tədbirin keçirilməsindən məqsəd NSHQMT-nin dünyadakı bütün milli məlumat mərkəzləri arasında əməkdaşlığın inkişaf etdirilməsi, dünyanın nüfuzlu elm təşkilatlarının təcrübəsindən daha çox yararlanmaq və Yer haqqında elmlərin dünya miqyasında irəliləyişinə səbəb olmaqdır. Beynəlxalq konfrans-sərgi bu gün öz işini başa vurur.