ABU-nun 200-dən çox məzunu diplomsuz qalıb

Onların taleyi Təhsil Nazirliyinin apardığı yoxlamaların nəticəsindən asılı olacaq

Son iki ildə Azərbaycan Beynəlxalq Universitetinin (ABU) 200-dək məzunu ali təhsil haqqında diplom ala bilməyib. Çünki həmin məzunların universitetə qəbulu zamanı ciddi qanun pozuntularına yol verilib.

Lent.az-ın məlumatına görə, Təhsil Nazirliyinin ali və orta ixtisas məktəbləri idarəsinin rəisi İlham Mustafayev jurnalistlərə açıqlamasında bildirib. O, qeyd edib ki, diplomsuz qalan 200-dən çox məzunu arasında Dağıstan Dövlət Universitetində təhsil alan, sonradan qanunsuz şəkildə ABU-ya köçürülənlər də var.

“Həmin məzunların taleyinin necə olacağı hələ məlum deyil. Çünki Təhsil Nazirliyi bu məsələ ilə bağlı ayrıca araşdırma aparır. Yekun qərar isə araşdırmaların nəticəsindən asılı olacaq”- deyə, İlham Mustafayev bildirib.

Xatırladaq ki, Azərbaycan hökumətinin qərarı ilə bu il ABU-ya tələbə qəbulunun aparılması qadağan edilib. Qarşıdakı bir il ərzində nöqsanlar aradan qaldırılmasa, universitetin birdəfəlik bağlanması gündəmə gələcək.

Elxan SALAHOV